మాస్కో: రష్యాలో నేడు రికార్డుస్థాయిలో కరోనా మరణాలు నమోదయ్యాయి. గత 24 గంటల వ్యవధిలో 737 మంది మరణించారు. ఈ స్థాయిలో మరణాలు నమోదు కావడం దేశంలో ఇదే తొలిసారి. కరోనాతో విలవిల్లాడిన తొలి ఐదు దేశాల్లో రష్యా కూడా ఒకటి. ప్రస్తుతం డెల్టా వేరియంట్ తన ప్రతాపాన్ని చూపుతోంది. కరోనాకు కేంద్రంగా ఉన్న మాస్కోలో నమోదవుతున్న మొత్తం కేసుల్లో 90 శాతం డెల్టా వేరియంట్‌కు సంబంధించినవేనని నగర మేయర్ సెర్గేయి సోబ్యానిన్ తెలిపారు.  

వ్యాక్సిన్ వేసుకోని ఉద్యోగుల్లో మూడొంతుల మందిని ఇంటికి పంపాలని  కార్యాలయాలను మేయర్ ఆదేశించారు. అలాగే టీకాలు తీసుకున్న వారిని, గత ఆరు నెలల్లో కరోనా బారినపడి కోలుకున్న వారిని మాత్రమే అనుమతించాలని రెస్టారెంట్లను కోరారు. ఆగస్టు మధ్యనాటికి సేవారంగంలో ఉన్న వారిలో 60 శాతం పూర్తిగా టీకాలు తీసుకుని ఉండాలని పేర్కొన్నారు. కాగా, సెప్టెంబరు నాటికి దేశంలోని 60 శాతం మందికి  టీకాలు పూర్తిచేయాలని ప్రభుత్వం భావిస్తోంది. రష్యాలో ఇప్పటి వరకు 1,39,316 మంది కరోనాతో మరణించారు. యూరప్‌లో అత్యధిక కరోనా మరణాలు నమోదైంది రష్యాలోనే.