కువైట్: కువైట్‌లో కరోనా వైరస్ వ్యాక్సిన్ పొందిన వారి సంఖ్య 2.51 మిలియన్లకు చేరుకుందని ఆరోగ్య మంత్రి డాక్టర్ షేక్ బాసిల్ అల్-సబా తెలిపారు. ప్రతి వారం నిర్వహించే మంత్రిమండలి సమావేశంలో మంత్రి ఈ విషయాన్ని వెల్లడించారు. దేశంలో కోవిడ్ వ్యాప్తి పరిస్థితులు స్థిరత్వ దశలో ఉన్నందున కోవిడ్ వ్యాప్తి, మరణాల రేటులో తగ్గుదల నమోదవుతున్నట్లు ఆయన వివరించారు. ప్రస్తుతం దేశవ్యాప్తంగా కోవిడ్ రికవరీ రేటు 96 శాతంగా ఉందన్నారు. మంత్రి వెల్లడించిన వివరాలు, కోవిడ్ వ్యాప్తి నియంత్రణకు తీసుకుంటున్న చర్యల పట్ల కేబినెట్ సంతృప్తి వ్యక్తం చేసింది. మహమ్మారిపై విజయం సాధించేందుకు ప్రతి ఒక్కరు బాధ్యతగా వ్యవహరించాలని, అందరూ వ్యాక్సిన్ తీసుకోవాలని ప్రజలకు మంత్రిమండలి పిలుపునిచ్చింది.