సౌదీ: నిబంధనలకు విరుద్ధంగా సౌదీలో ఉంటున్న 15,900 మందిని సౌదీ ఉమ్మడి భద్రతా దళాలు గుర్తించాయి. ఆగస్ట్ 12 నుంచి 18 వరకు నిర్వహించిన వారం రోజుల తనిఖీలో పలువురు చట్టవిరుద్ధంగా కింగ్డమ్ లో ఉంటున్నట్లు తేలిందని అంతర్గత మంత్రిత్వ శాఖ వెల్లడించింది. పట్టుబడిన వారిలో రెసిడెన్సీ పర్మిట్ ముగిసిన వారు  5,436 మంది ఉండగా..బోర్డర్ సెక్యూరిటీ నిబంధనలు ఉల్లంఘించిన వారు 9,075 మంది, లేబర్ చట్టాలను ఉల్లంఘించిన వారు 1,389 మంది ఉన్నారు. ఇక చట్టవిరుద్ధంగా సరిహద్దు దాటడానికి ప్రయత్నించినందుకు 454 మందిని అరెస్టు చేశారు. వీరిలో 51% మంది ఇథియోపియన్, 45% యెమెన్ మరియు 4% ఇతర జాతీయులు ఉన్నట్లు మంత్రిత్వ శాఖ తెలిపింది. ఇంతలో, రాజ్యం నుండి చట్టవిరుద్ధంగా నిష్క్రమించడానికి ప్రయత్నించినందుకు 23 మందిని అరెస్టు చేశారు. నిబంధనలు ఉల్లంఘించిన వారిలో 8,000 మందికి పైగా ప్రవాసీయులను కింగ్డమ్ నుంచి బహిష్కరించారు. ఇదిలాఉంటే..చట్టవిరుద్ధంగా ఇతరులను కింగ్డమ్ లోకి తీసుకొచ్చి ఆశ్రయం కల్పించిన ఎనిమిది మందిని అరెస్టు చేశారు. దేశంలోకి చట్టవిరుద్ధంగా ప్రవేశించడానికి సాయం చేసిన వారికి 15 సంవత్సరాల వరకు జైలు శిక్ష, ఒక మిలియన్ రియాల్ వరకు జరిమానా ఎదుర్కొవాల్సి వస్తుందని మంత్రిత్వ శాఖ హెచ్చరించింది.