బహ్రెయిన్: అఫ్గనిస్తాన్ తాలిబన్ చెరలోకి వెళ్లిన తర్వాత అక్కడి నుంచి వేల సంఖ్యలో అఫ్గన్లు దేశం విడిచి పారిపోతున్నారు. తాలిబన్ల నుంచి ప్రాణాలు రక్షించుకునేందుకు ఇతర దేశాలకు పయనం అవుతున్నారు. అయితే..ఇలాంటి విపత్కర పరిస్థితుల్లో అఫ్గన్ శరణార్ధులకు బాసటగా నిలిచేందుకు ప్రయాణ నిబంధనలను సులభతరం చేసింది బహ్రెయిన్. అఫ్గన్ శరణార్ధులు ఇతర దేశాలకు వెళ్లేందుకు వీలుగా తమ ఎయిర్ పోర్టులను వినియోగించుకోవచ్చని వెళ్లండించింది. అంటే..ముందుగా అఫ్గన్ నుంచి బహ్రెయిన్ చేరుకొని  అక్కడి నుంచి వారి గమ్యస్థానానికి చేరుకునేందుకు వెసులుబాటు ఉంటుంది. ఈ మేరకు అఫ్గన్ శరణార్ధులతో వచ్చే ఫ్లైట్స్ కి బహ్రెయిన్ గ్రీన్ సిగ్నల్ ఇచ్చింది. మానవతా దృక్ఫథంతో శరణార్ధులను ఆదుకోవటం తమ నైతిక బాధ్యత భావిస్తున్నామని, అఫ్గన్ శరణార్ధుల తరలింపు సులభతరం చేయటంలో తమ నిర్ణయం దోహదపడుతుందని బహ్రెయిన్ పేర్కొంది. శరణార్ధులను ఆదుకునేందుకు ముందుకు వచ్చే ప్రపంచ దేశాలతో కలిసి పని చేయనున్నట్లు వివరించింది. ఆఫ్గనిస్తాన్‌లో జరుగుతున్న పరిణామాలను తాము నిశితంగా గమనిస్తున్నామని, దేశీయ పరిస్థితులను స్థిరీకరించడం, ప్రస్తుత పరిస్థితుల్లో పౌరుల ప్రాణాలను కాపాడటంలో అన్ని పార్టీలు పాల్గొంటాయని ఆశాభావం వ్యక్తం చేసింది.