సౌదీ: కింగ్డమ్ లోకి నకిలీ డాక్యుమెంట్లతో అక్రమంగా చొరబడే వారిపై సౌదీ ప్రభుత్వం మరింత కఠినంగా వ్యవహరించనుంది. నిబంధనలను ఉల్లంఘించిన వారికి జైలు శిక్ష, జరిమానాలను దాదాపుగా రెట్టింపు చేస్తూ ట్రావెల్ లాలో సవరణలు చేసింది. చట్ట సవరణ ప్రకారం పాస్‌పోర్ట్‌లు/లైసేజ్-పాసర్ టిక్కెట్‌లను ఫోర్జరీ చేస్తే ఐదేళ్ల వరకు జైలు శిక్ష, SR 1,00,000  జరిమానా విధించనున్నారు. గతంలో మూడేళ్ల జైలు శిక్ష, SR50,000 జరిమానా ఉండేది. పాస్‌పోర్ట్‌లు/లైసేజ్-పాసర్ టిక్కెట్‌లలో అదనంగా సమాచారాన్ని జోడించడం, ఉన్న సమాచారాన్ని తొలగించడం, మార్చటం చేయటాన్ని ఫోర్జరీగా పరిగణిస్తారు. అలాగే ఉద్దేశపూర్వకంగా పాస్‌పోర్ట్‌లను నాశనం చేయడం లేదా డేటాను మార్చటం, వ్యక్తిగత ఫోటోలను మార్చడం వంటివి కూడా ట్రావెల్ లా నిబంధనల ఉల్లంఘన కిందికి వస్తాయి. అంతేకాదు..పాస్‌పోర్ట్/లైసేజ్-పాస్‌సర్ టిక్కెట్‌ని నిర్లక్ష్యంగా పోగొట్టుకోవటం, పాస్‌పోర్ట్‌లను చట్టవిరుద్ధంగా ఉపయోగించడం, పాస్‌పోర్ట్ లేదా లైసెజ్-పాస్‌సర్ టిక్కెట్ విక్రయించటం కూడా ట్రావెల్ లా ఉల్లంఘనగా పరిగణిస్తారు. మూడవ పక్షానికి చెందిన పాస్‌పోర్ట్/లైసేజ్-పాసర్ టికెట్‌ని ఉపయోగించడానికి ప్రయత్నించే వారిపై, అలాగే సరైనా ట్రావెల్ డాక్యుమెంట్లు లేకుండా నిర్దేశిత పోర్ట్‌ల ద్వారా కింగ్‌డమ్‌ కి వచ్చినా, వెళ్లే ప్రయత్నం చేసినా కూడా శిక్షార్హులు అవుతారు.