అదేమైనా నోరా.. తాటి మట్టా.? అనడం వింటుంటాం కదా. అవును, వెనకా ముందూ చూడకుండా, నోటి కొచ్చిందల్లా మాట్లాడేవాళ్ల విషయంలో ఈ మాట తరచూ వాడటం తెలిసిందే. ఆ మాటను నటి కరాటే కళ్యాణి విషయంలోనూ కొందరు బాగానే వాడేస్తుంటారనుకోండి. అందుకు కారణం ఆమె నోరే.

అది సరే, ఇప్పుడా నోటికి వచ్చిన చిక్కేంటో.? అనుకుంటున్నారా.? ఓ యూ ట్యూబర్‌పై నోటి వాటమే కాదు, కాస్త చేతి వాటం కూడా ప్రయోగించిన గొడవలో కళ్యాణి ఈ మధ్య రచ్చకెక్కిన ముచ్చట ఇప్పుడు వైరల్ అయ్యింది మరి.

ఎవరితోనైనా పెట్టుకోవచ్చు కానీ, అమ్మో.! కరాటే కళ్యాణితో పెట్టుకుంటే ఇంకేమైనా వుందా.? అమ్మాయిలపై అసభ్యకరమైన ప్రాంక్ వీడియోలు తీస్తున్నాడంటూ ఓ యూ ట్యూబర్‌పై ఆరోపణలు చేస్తూ, అతని ఇంటికి వెళ్లి చితకబాదుడు బాదేసింది కరాటే కళ్యాణి.
 
ఆ యూ ట్యూబర్ (పేరు శ్రీకాంత్ రెడ్డి) కూడా తక్కువేం తీనలేదనుకోండి. కళ్యాణిపై కూడా చేయి చేసుకున్నాడట. ఈ వివాదం పోలీస్ స్టేషన్ వరకూ వెళ్లి, ఇరువురిపై కేసులు నమోదయ్యేదాకా చేరింది. అయితే, ఏం జరిగిందో ఏమో కానీ, కరాటే కళ్యాణి అజ్ఞాతంలోకి వెళ్లిపోయింది.

కట్ చేస్తే, ఆమెపై చిన్న పిల్లల కిడ్నాప్ ఆరోపణ ఒకటి తాజాగా వెలుగులోకి వచ్చింది. ఈ మధ్యనే ఓ చిన్నపిల్లను కరాటే కళ్యాణి దత్తత తీసుకుందన్న వార్త మీడియాలో వినిపించింది. అయితే, తాజా ఇష్యూలో తేలిందేంటంటే, ఆ దత్తతకు సంబంధించి ఎలాంటి అధికారిక ఆధారాల్లేవని అంటున్నారు. పాపం కళ్యాణి ఏదో అనుకుంటే, ఇంకేదో అయ్యింది మరి.