కువైట్: విదేశీయుల నివాస చట్టానికి సవరణలను పార్లమెంటు అంతర్గత, రక్షణ కమిటీ ఆమోదించింది. దీని కింద పెట్టుబడిదారులు మొదటిసారిగా 15 సంవత్సరాల రెసిడెన్సీని పొందుతారు. అయితే రియల్ ఎస్టేట్ యజమానులు, కువైట్ మహిళల పిల్లలు 10 సంవత్సరాల పాటు చెల్లుబాటు అయ్యే ఇఖామాలను పొందుతారు. కమిటీ నివేదికను జాతీయ అసెంబ్లీకి పంపనున్నారు. ముసాయిదా చట్టం అమలులోకి రావడానికి జాతీయ అసెంబ్లీ ఆమోదించి, ప్రభుత్వం సంతకం చేయాల్సి ఉంటుంది. ముసాయిదా చట్టం ప్రకారం.. విదేశీయులు ఐదేళ్ల వరకు రెగ్యులర్ రెసిడెన్సీని పొందవచ్చు. అయితే వారి ఇఖామా గడువు ముగిసినట్లయితే పునరుద్ధరణ కోసం వారు దరఖాస్తు చేయవచ్చు. కువైట్‌లో సాధారణ నివాసం ఉండే విదేశీయులందరూ ఆరు నెలల కంటే ఎక్కువ కాలం దేశం వెలుపల ఉండకూడదు, లేదంటే వారి రెసిడెన్సీ రద్దు చేయబడుతుంది. పెట్టుబడిదారులు, రియల్ ఎస్టేట్ యజమానులు, కువైట్ మహిళల పిల్లలకు ఈ షరతు నుండి మినహాయింపు ఉంది. అదేసమయంలో గృహ సహాయకులు నాలుగు నెలల కంటే ఎక్కువ కాలం దేశం వెలుపల ఉంటే వారి నివాస అనుమతి రద్దు అవుతుంది. పెట్టుబడి మొత్తంతో సహా పెట్టుబడిదారులు 15 సంవత్సరాల రెసిడెన్సీని పొందగలిగే షరతులను క్యాబినెట్ నిర్దేశిస్తుందని బిల్లు చెబుతుంది. కొత్త చట్టం ప్రకారం.. కువైట్ మహిళలు తమ భర్తలు, పిల్లలను స్పాన్సర్ చేయవచ్చు. అలాగే పిల్లలను కలిగి ఉన్న కువైట్ భర్తల విదేశీ వితంతువులు లేదా విడాకులు తీసుకున్నవారు కూడా తమను తాము స్పాన్సర్ చేసుకోవచ్చు.