దోహా: ఖతార్ క్రియేట్స్‌లో భాగంగా ఖతార్‌లోని సాంస్కృతిక కార్యక్రమాల వైవిధ్యాన్ని తెలియజేసేలా దోహా వీధుల్లో మరో 40 కళాఖండాలను ఏర్పాటు చేయనున్నట్లు ఖతార్ మ్యూజియం ప్రకటించింది. ఇందుకోసం అంతర్జాతీయ కళాకారులు దోహా, ఇతర ప్రాంతాల్లో తమ కళాఖండాలను ప్రదర్శించనున్నట్లు పేర్కొంది. ఖతారీ ఎడారి నుండి సందడిగా ఉండే సౌక్ వాకిఫ్ వరకు రాబోయే రోజుల్లో 100 కంటే ఎక్కువ పబ్లిక్ ఆర్ట్‌వర్క్‌లను ఏర్పాటు చేయనున్నట్లు ఖతార్ మ్యూజియమ్స్ చైర్‌పర్సన్ హెచ్ ఇ షేఖా అల్ మయాస్సా బింట్ హమద్ బిన్ ఖలీఫా అల్ థానీ తెలిపారు. పార్కులు, షాపింగ్ ప్రాంతాలు, విద్యా, అథ్లెటిక్ సౌకర్యాలు, హమద్ ఇంటర్నేషనల్ ఎయిర్‌పోర్ట్, క్యూ-రైల్ స్టేషన్‌లు, అలాగే ప్రపంచ కప్ మ్యాచ్‌లకు ఆతిథ్యం ఇచ్చే స్టేడియాలతో సహా బాటసారులను ఆకట్టుకునేలా.. ఆహ్లాదపరిచేలా పబ్లిక్ స్పేస్‌లలో అంతర్జాతీయ ప్రసిద్ధ కళాకారులు రూపొందించిన కళాఖండాలను ఏర్పాటు చేయనున్నట్లు పేర్కొన్నారు.