యూఏఈ: కార్మికులు వేతనాల కోసం చేపట్టిన సమ్మె కారణంగా దుబాయ్‌కి చెందిన ఎమిరేట్స్ ఎయిర్‌లైన్స్ ఫిబ్రవరి 27న అనేక విమానాలను రద్దు చేస్తున్నట్లు ప్రకటించింది. డ్యూసెల్‌డార్ఫ్ విమానాశ్రయంలో ప్రకటించిన సార్వత్రిక సమ్మె కారణంగా ఫిబ్రవరి 27న దుబాయ్ -డ్యూసెల్‌డార్ఫ్ మధ్య పలు విమానాలు రద్దు చేసినట్లు ఎమిరేట్స్ తెలిపింది. రద్దయిన విమానాల్లో EK055: దుబాయ్ నుండి డ్యూసెల్డార్ఫ్, EK056: డ్యూసెల్డార్ఫ్ నుండి దుబాయ్, EK057 : దుబాయ్ నుండి డ్యూసెల్డార్ఫ్, EK058 : డ్యూసెల్డార్ఫ్ నుండి దుబాయ్ ఉన్నాయి.

జర్మనీలోని వెర్డి లేబర్ యూనియన్ ప్రాతినిధ్యం వహిస్తున్న ఎయిర్‌పోర్ట్ గ్రౌండ్ స్టాఫ్ వేతనాన్ని పెంచాలని డిమాండ్ చేస్తూ ఫిబ్రవరి 27న కొలోన్ బాన్ (CGN),  డ్యూసెల్‌డార్ఫ్ (DUS) విమానాశ్రయాల వద్ద సమ్మె చేయాలని యోచిస్తున్నారు. సమ్మె ఫిబ్రవరి 26-27 రాత్రిపూట ప్రారంభమై.. ఫిబ్రవరి 27-28 రాత్రిపూట ముగియనుంది. సమ్మె కారణంగా ప్రభావిత విమానాశ్రయాలలో ప్రాసెసింగ్ ఆలస్యం, రద్దుతో సహా విమాన అంతరాయాలు ఏర్పడే అవకాశం ఉందని అధికారులు తెలిపారు. అసౌకర్యానికి విచారం వ్యక్తం చేసిన ఎమిరేట్స్.. బాధిత ప్రయాణికులు ప్రత్యామ్నాయ ప్రయాణ ఏర్పాట్లు చేసుకోవాలని సూచించింది.  మరింత సమాచారం కోసం ట్రావెల్ ఏజెంట్లు, ఎమిరేట్స్‌ కార్యాలయాల్లో సంప్రదించాలని కోరింది.