బుధవారం బంగారం ధర తగ్గింది. రూ.150 తగ్గడంతో 99.9 శాతం స్వచ్ఛత గల పది గ్రాముల పసిడి ధర రూ.30,100కు చేరింది. బలహీనంగా ఉన్న ప్రపంచ మార్కెట్ల ప్రభావం, కీలక సమయాల్లో దేశీయంగా కొనుగోళ్ల మద్దతు లభించకపోవడం తదితర కారణాల వల్ల దీని ధర తగ్గిందని బులియన్‌ మార్కెట్‌ వర్గాలు తెలిపాయి. అంతర్జాతీయంగా సింగపూర్‌ బులియన్‌ మార్కెట్లో ఔన్సు బంగారం ధర 0.6శాతం తగ్గి 1,278.99 యూఎస్‌ డాలర్లకు చేరింది.అలాగే అమ్మకాల ఒత్తిడితో వెండి వరసగా మూడో రోజూ తగ్గింది. ఈ ఒక్క రోజులోనే రూ.550 తగ్గడంతో కేజీ వెండి ధర రూ.41,050కి చేరింది. పారిశ్రామిక వర్గాలు, నాణేల తయారీదారుల నుంచి కొనుగోళ్లు మందగించడంతో దీని ధర తగ్గిందని బులియన్‌ మార్కెట్‌ వర్గాలు తెలిపాయి.