యూఏఈ: షార్జా మున్సిపాలిటీ సోమవారం ఎమిరేట్‌లో పవిత్ర రమదాన్ మాసంలో చెల్లింపు పార్కింగ్ గంటలను(పెయిడ్ పార్కింగ్ అవర్స్) ప్రకటించింది. శనివారం నుండి గురువారం వరకు ఉదయం 8 నుండి అర్ధరాత్రి వరకు చెల్లింపు పార్కింగ్ గంటలు ఉంటాయి. నీలి రంగు సమాచార చిహ్నాలను కలిగి ఉన్న జోన్‌లలో మినహా శుక్రవారాల్లో పార్కింగ్ ఉచితం. అటువంటి ప్రాంతాలలో  పార్కింగ్ అనేది వారంలోని అన్ని రోజులలో చెల్లింపు సేవ కిందనే ఉంటుంది. మునిసిపాలిటీ షార్జా సిటీ పార్క్స్ ప్రారంభ వేళలను కూడా ప్రకటించింది. పార్కులు వారంలో అన్ని రోజులు సాయంత్రం 4 గంటల నుండి అర్ధరాత్రి వరకు తెరిచి ఉంటాయి.  ఇంతకుముందు, షార్జా ఎమిరేట్ ప్రభుత్వ సంస్థలలో ఉద్యోగుల కోసం అధికారిక రమదాన్ పని గంటలను కూడా ప్రకటించింది. సిబ్బంది ఉదయం 9 గంటల నుంచి మధ్యాహ్నం 2.30 గంటల వరకు పని చేయాలి. FAHR మంత్రిత్వ శాఖలు, సమాఖ్య అధికారులకు సోమవారం నుండి గురువారం వరకు ఉదయం 9 నుండి మధ్యాహ్నం 2.30 వరకు..  శుక్రవారం ఉదయం 9 నుండి మధ్యాహ్నం 12 గంటల వరకు అధికారిక పని వేళలను సెట్ చేసింది. ప్రైవేట్ రంగానికి సంబంధించి యూఏఈ మానవ వనరులు, ఎమిరాటైజేషన్ మంత్రిత్వ శాఖ (మోహ్రే) ఇటీవల పవిత్ర మాసంలో పని షిఫ్ట్‌లను రెండు గంటలు తగ్గించనున్నట్లు ప్రకటించింది.