భలే భలే మగాడివోయ్, కృష్ణ గాడి వీరప్రేమగాథ సినిమాల హిట్స్‌తో ఫుల్ జోష్‌మీదున్నాడు టాలీవుడ్ యాక్టర్ నాని. ప్రస్తుతం నాని జెంటిల్‌మెన్ గా ప్రేక్షకులను అలరించేందుకు సిద్దమవుతున్న విషయం తెలిసిందే. ఈ సినిమా తర్వాత నాని విరించి వర్మ దర్శకత్వంలో ఓ సినిమా చేయడానికి గ్రీన్‌సిగ్నల్ ఇచ్చాడు. అసిస్టెంట్ డైరెక్టర్ నుంచి హీరోగా మారిన నాని రియల్‌లైఫ్‌లో పోషించిన పాత్రను రీల్‌లైఫ్‌లో కూడా పోషించనున్నారు. లేటెస్ట్ ప్రాజెక్టులో నాని అసిస్టెంట్ డైరెక్టర్‌గా కనిపించనున్నారని టాలీవుడ్ వర్గాలు వెల్లడించాయి. విరించి వర్మ దర్శకత్వంలో రొమాంటిక్ డ్రామాగా వస్తోన్న ఈ మూవీలో ప్రముఖ టాలీవుడ్ దర్శకుడు ఎస్‌ఎస్ రాజమౌళి అతిథి పాత్రలో కనిపించనున్నారట. విరించి వర్మ దర్శకత్వంలో వచ్చిన ఉయ్యాలా జంపాలా మంచి హిట్ చిత్రంగా నిలిచిన విషయం తెలిసిందే.