మస్కట్: గ్లోబల్ డేటాబేస్ "నంబియో" జారీ చేసిన 2023 సంవత్సరానికి సంబంధించిన వరల్డ్ ట్రాఫిక్ ఇండెక్స్ లో  ట్రాఫిక్ పరంగా మస్కట్ అత్యుత్తమ అరబ్ నగరంగా నిలిచింది. ట్రాఫిక్ వారీగా అత్యంత రద్దీగా ఉండే నగరాల పరంగా మస్కట్ ప్రపంచంలో 185వ స్థానంలో ఉంది. ఈ విషయంలో అరబ్ ప్రపంచంలో అతి తక్కువ రద్దీగా.. ట్రాఫిక్ పరంగా అత్యుత్తమంగా నిలిచింది. దీనిపై  రాయల్ ఒమన్ పోలీస్ (ROP) స్పందిస్తూ.. “సుల్తానేట్ గవర్నరేట్‌లలోని ట్రాఫిక్ డైరెక్టరేట్‌లు రహదారి వినియోగదారుల కోసం ట్రాఫిక్ ప్రవాహాన్ని సురక్షితం చేయడంలో, సలహాలు -మార్గదర్శకత్వం అందించడంలో తమ పాత్రను పోషిస్తాయి. డ్రైవర్లు, పాదచారులు ట్రాఫిక్ నియమాలు, నిబంధనలకు కట్టుబడి ఉండాలని విజ్ఞప్తి చేస్తున్నాము. తద్వారా వినియోగదారులకు రోడ్లు సురక్షితంగా మారతాయి.’’ అని వెల్లడించింది.

2023 సంవత్సరానికి సంబంధించిన వరల్డ్ ట్రాఫిక్ ఇండెక్స్ నివేదిక ప్రకారం.. నెదర్లాండ్స్‌లోని పెస్ట్ నగరం ట్రాఫిక్ పరంగా ప్రపంచంలోనే అత్యుత్తమ నగరంగా నిలిచింది. క్రొయేషియాలో స్ప్లిట్, ఆ తర్వాత స్విట్జర్లాండ్‌లోని బాసెల్ , ఆస్ట్రియా రాజధాని వియన్నా ఈ జాబితాలో ఉత్తమ నగరాలుగా నిలిచాయి.  నైజీరియా రాజధాని లాగోస్ ట్రాఫిక్ పరంగా ప్రపంచంలోనే అత్యంత అధ్వాన్నమైన నగరంగా నిలిచింది. అమెరికా నగరం లాస్ ఏంజెల్స్ తర్వాతి స్థానంలో ఉంది. వీటి తర్వాత కోస్టారికాలోని శాన్ జోస్, శ్రీలంకలోని కొలంబో, బంగ్లాదేశ్ రాజధాని ఢాకా, ఆపై యునైటెడ్ అరబ్ ఎమిరేట్స్ (UAE)లోని షార్జా నగరం ఉన్నాయి.