యూఏఈ: యూఏఈ మానవ వనరులు, ఎమిరాటైజేషన్ మంత్రిత్వ శాఖ (MoHRE) ద్వారా రెండు కొత్త కేటగిరీలను జోడించింది. దీంతో యూఏఈలో జాబ్ లాస్ ఇన్సూరెన్స్ పథకానికి సభ్యత్వం పొందగల ఉద్యోగుల సంఖ్య పెరగనుంది. ఫ్రీ జోన్‌లు, సెమీ-గవర్నమెంట్ సంస్థలలో పనిచేస్తున్న ఉద్యోగులు కూడా MoHRE ప్రవేశపెట్టిన అసంకల్పిత ఉపాధి నష్టం (ILoE) పథకం కోసం నమోదు చేసుకోవచ్చని మంత్రిత్వ శాఖ తెలిపింది. 2023 జనవరి 1 నుండి ప్రైవేట్ సెక్టార్, ఫెడరల్ ప్రభుత్వంలో పనిచేస్తున్న ఉద్యోగులు ఉద్యోగ నష్ట బీమాకు సభ్యత్వాన్ని పొందడాన్ని మంత్రిత్వ శాఖ తప్పనిసరి చేసింది. జూన్ 30లోపు సబ్‌స్క్రయిబ్ చేయడంలో విఫలమైతే ఉద్యోగులకు 400 దిర్హామ్‌ల జరిమానా విధించనున్నట్లు ప్రకటించింది. అలాగే, గడువు తేదీ నుండి మూడు నెలలకు పైగా ప్రీమియంలు చెల్లించడంలో విఫలమైతే Dh200 జరిమానా విధించబడుతుందని హెచ్చరించింది.

అసంకల్పిత ఉపాధి నష్టం బీమా పథకం కింద Dh16,000 కంటే తక్కువ ప్రాథమిక జీతం కలిగిన ఉద్యోగులు నెలకు Dh5 లేదా సంవత్సరానికి Dh60, VATని ప్రీమియంగా చెల్లించాలి. వరుసగా మూడు నెలలపాటు ఉద్యోగం కోల్పోయిన వారికి సగటు బేసిక్ జీతంలో 60 శాతం పరిహారం ఇవ్వబడుతుంది. Dh16,000 కంటే ఎక్కువ ప్రాథమిక జీతం ఉన్న ఉద్యోగులు ఈ పథకం కింద నెలకు Dh10 లేదా Dh120 వార్షిక ప్రీమియం చెల్లించాల్సి ఉంటుంది. పాలసీ వ్యవధి ఒకటి లేదా రెండు సంవత్సరాలు అందుబాటులో ఉంటుంది. దుబాయ్ ఇన్సూరెన్స్, ILOE వెబ్‌సైట్, అల్ అన్సారీ ఎక్స్ఛేంజ్, ATMల నుండి సబ్‌స్క్రిప్షన్‌లు చేయవచ్చు. జనవరి 2023లో ప్రారంభించినప్పటి నుండి సబ్‌స్క్రైబర్‌ల సంఖ్య ఒక మిలియన్‌కు మించిందని ఏప్రిల్ ప్రారంభంలో మంత్రిత్వ శాఖ తెలిపింది. మానవ వనరులు, ఎమిరేటైజేషన్ మంత్రి డాక్టర్ అబ్దుల్‌రహ్మాన్ అల్ అవార్ మాట్లాడుతూ.. ఈ పథకానికి సభ్యత్వం పొందేందుకు అర్హులైన ఉద్యోగులు కవరేజ్ నుండి ప్రయోజనం పొందాలని,  యజమానులు తమ ఉద్యోగులను సబ్‌స్క్రయిబ్ చేసుకునేలా ప్రోత్సహించాలని పిలుపునిచ్చారు.