కువైట్: కొత్త రకం స్పోర్ట్స్ వీసాలను ప్రవేశపెట్టాలని నిర్ణయం తీసుకున్నట్టు ఉప ప్రధాన మంత్రి, అంతర్గత మంత్రి, తాత్కాలిక రక్షణ మంత్రి షేక్ తలాల్ అల్-ఖాలీద్ అల్-సబాహ్ తెలిపారు. దీని ద్వారా క్రీడలు, సాంస్కృతిక,  సామాజిక కార్యకలాపాలను అభ్యసించడానికి కువైట్‌లోకి ప్రవేశించవచ్చని పేర్కొన్నారు. ఈ రకమైన వీసా కువైట్‌లో 3 నెలల వ్యవధిలో తాత్కాలిక నివాసాన్ని అనుమతిస్తుందని, ప్రవేశ తేదీ నుండి ఒక సంవత్సరం వరకు పునరుద్ధరణ అవకాశం ఉందని, అమిరి డిక్రీ నంబర్ 17 1959లోని ఆర్టికల్ 11లో స్పష్టం చేశారు.

జనరల్ డైరెక్టరేట్ ఆఫ్ రెసిడెన్స్ అఫైర్స్ నిర్దేశించిన మార్గదర్శకాలకు అనుగుణంగా గుర్తింపు పొందిన క్రీడా క్లబ్‌లు, గుర్తింపు పొందిన సాంస్కృతిక, సామాజిక సంస్థలు, సంస్థలు లేదా అసోసియేషన్ల అభ్యర్థనను సమర్పించిన తర్వాత జనరల్ డైరెక్టరేట్ ఆఫ్ రెసిడెన్స్ అఫైర్స్ ద్వారా వీసా మంజూరు చేయబడుతుంది. ఏడాదికి పైగా ఆగిపోయిన కుటుంబ విజిట్ వీసా కోసం ఎదురుచూస్తున్న వారికి కొత్త ఆర్డర్ కొత్త ఆశను కలిగించింది. విశ్వసనీయ సమచారం ప్రకారం, కువైట్ మరోసారి విజిట్ వీసాల కోసం దరఖాస్తు చేసుకునేందుకు కుటుంబాలను అనుమతించవచ్చని తెలుస్తోంది. అయితే, కుటుంబ వీసాల జారీపై అధికారిక ప్రకటన వెలువడాల్సి ఉంది. 

--దివాకర్(మాగల్ఫ్ ప్రతినిధి, కువైట్)