వేసవిలోనూ, చలికాలంలోనూ కూడా కొందరికి చర్మం పొడిబారిపోయి దురద, దద్దుర్లు వంటివి ఇబ్బంది పెడుతుంటాయి. ఈ ఇబ్బందిని ఎదుర్కోవాలంటే స్నానం చేసే నీళ్లలో రెండు చుక్కల కొబ్బరినూనె వేసినా మంచి ఫలితం ఉంటుంది. కొబ్బరి నూనెలో కొన్ని మెంతులు వేసి మరగబెట్టి, గోరు వెచ్చగా అయ్యాక ఒంటికి రాసుకోవాలి.  ఎక్కువగా చలి కాలంలో చర్మంతో పాటు మాడు కూడా పొడిబారి దురద పెడుతూ ఉంటుంది. దీని నుంచి ఉపశమనం పొందాలంటే కొద్దిగా కొబ్బరి నూనెలో రెండు చుక్కల వెనిగర్‌ వేసి ఆ మిశ్రమాన్ని దూదితో తలకు పట్టిస్తే ఫలితం ఉంటుంది. కలబంద గుజ్జులో అంతే పరిమాణంలో బొప్పాయి గుజ్జుని కలిపి ఆ మిశ్రమాన్ని ఒంటికీ, జుట్టుకీ రాసుకుని ఆరిన తరువాత గోరు వెచ్చని నీటితో స్నానం చేయాలి. ఇలా చేయడం వల్ల చర్మంలో తేమ పెరిగి తాజాగా కనిపిస్తుంది. మరియు దురద, దద్దుర్ల సమస్య కూడా తీరుతుంది. వీటన్నిటితోపాటూ వాడే సబ్బు విషయంలో తగిన జాగ్రత్తలు తీసుకోవడం ముఖ్యం. మీ శరీరానికి ఏ సబ్బు సరిపోతుందో తెలుసుకుని, దాన్ని మాత్రమే వినియోగించాలి. మార్కెట్‌లో దొరికే కొత్త కొత్త సబ్బుల్ని ఉపయోగించాలనే సరదాని పక్కనపెడితే, శరీరం ఆరోగ్యకరంగా ఉంటుంది.