స్వదేశీ పరిజ్ఞానంతో రూపొందించిన ఫృథ్వి-2 క్షిపణిని ఒడిశాలోని చాందీపూర్‌ నుంచి మరోసారి విజయవంతంగా ప్రయోగించారు. భారత అమ్ముల పొదిలో చేరనున్న అత్యాధునికమైన ఈ క్షిపణిని సాధారణ పరీక్షల్లో భాగంగా ఈరోజు పరీక్షించారు. అణ్వస్త్ర సామర్థ్యం గల ఫృథ్వి -2 క్షిపణి 350 కి.మీ.ల దూరంలో లక్ష్యాలను ఛేదించగలదు. 500 నుంచి వెయ్యి కేజీల వార్‌హెడ్‌ను మోసుకుపోగలదు. రెండు సార్లు ప్రయోగానికి ఏర్పాట్లు చేసినా మొదటి ట్రయల్‌ విజయవంతంగా పూర్తయిన తర్వాత సాంకేతిక కారణాల వల్ల రెండో ప్రయోగం నిలిపేసినట్లు అధికారులు వెల్లడించారు. ప్రయోగాన్ని డీఆర్‌డీఓ, రక్షణ శాఖ అధికారులు పర్యవేక్షించారు.