చాలా రోజులుగా ఓ బ్లాక్ బస్టర్ హిట్ కోసం ఎదురుచూసిన యంగ్ హీరో రామ్, నేను శైలజ సినిమాతో అనుకున్నది సాధించాడు. కీర్తి సురేష్ హీరోయిన్ గా కిశోర్ తిరుమల దర్శకత్వంలో తెరకెక్కిన నేను శైలజ, రామ్ కెరీర్ లో బిగెస్ట్ హిట్ గా నిలిచింది. ఈ సక్సెస్ తరువాత ఎలాంటి సినిమా చేయాలన్న ఆలోచనతో చాలా రోజులు గడిపేసిన రామ్ ఫైనల్ గా కందిరీగ కాంబినేషన్ లో సినిమా అంగీకరించాడు. త్వరలో సెట్స్ మీదకు వెళ్లనున్న ఈ సినిమాకు హీరోయిన్ ను వెతికే పనిలో ఉన్నారు చిత్రయూనిట్.ముందుగా సినిమాలో తమన్నాను హీరోయిన్ గా తీసుకోవాలని భావించారు, అయితే గతంలో రామ్, తమన్నాల కాంబినేషన్ లో వచ్చిన ఎందుకంటే ప్రేమంట ఫ్లాప్ టాక్ తెచ్చుకుంది. దీంతో తమన్నా కన్నా రాశీఖన్నా బెటర్ అని ఫీల్ అయ్యారు. అయితే రామ్, రాశీతో జోడి కట్టిన శివం సినిమా రిజల్ట్ కూడా ఆశించిన స్థాయిలో లేకపోవటంతో రామ్ మరోసారి ఆలోచనలో పడ్డాడు. ఫైనల్ గా తనతో సక్సెస్ ఫుల్ పెయిర్ అనిపించుకున్న రకుల్ ప్రీత్ సింగ్ తో జోడి కట్టేందుకు ఫిక్స్ అయ్యాడు రామ్. పండగచేస్కో సినిమాతో పర్వాలేదని పించిన ఈ జంట ఇప్పుడు మరోసారి వెండితెర మీద సందడి చేయడానికి రెడీ అవుతోంది.