టెహ్రాన్: ఇరాన్ మరియు సౌదీ అరేబియా ఈ ప్రాంతంతోపాటు ఇస్లామిక్ ప్రపంచంలో రెండు ప్రభావవంతమైన దేశాలని ఇరాన్ అధ్యక్షుడు ఇబ్రహీం రైసీ అన్నారు. మెరుగైన ఇరాన్-సౌదీ సంబంధాలు ఈ ప్రాంతంలో విదేశీ జోక్యాల పరిధిని తగ్గించగలవని రైసీ చెప్పారు. సౌదీ అరేబియాకు నియమించబడిన ఇరాన్ రాయబారి అలీరెజా ఎనయాటి రియాద్‌కు బయలుదేరే ముందు ఇరాన్ అధ్యక్షుడిని కలిసారు. టెహ్రాన్,  రియాద్ మధ్య సంబంధాలను మరింత ప్రోత్సహించాలని ఈ సందర్భంగా రైసీ పిలుపునిచ్చారు. 2023 మార్చి 10న బీజింగ్‌లో చైనా మధ్యవర్తిత్వం వహించిన చారిత్రాత్మక ఒప్పందంలో సౌదీ అరేబియా, ఇరాన్ రెండు దేశాల మధ్య దౌత్య సంబంధాలను పునఃప్రారంభించాలని..  ఏడేళ్ల విరామం తర్వాత తమ దౌత్య కార్యకలాపాలను పునఃప్రారంభించాలని నిర్ణయించుకున్నాయి. మరోవైపు ఇరాన్‌లో సౌదీ అరేబియా కొత్త రాయబారి అబ్దుల్లా అల్-ఎనెజీ మంగళవారం తన బాధ్యతలను స్వీకరించేందుకు ఇరాన్ రాజధాని టెహ్రాన్ చేరుకున్నారు. అక్కడికి చేరుకున్న ఆయనకు ఇరాన్ సీనియర్ అధికారులు స్వాగతం పలికారు.