ఉష్ణోగ్రతలు పెరుగుతుండడంతో పలు ప్రైవేటు స్కూళ్ళు తమ పని వేళల్ని తగ్గించుకోగా, మిగతా స్కూళ్ళు కూడా అదే దారిలో పయనించనున్నాయి. జులై నుంచి సుదీర్ఘమైన వేసవి సెలవులకు స్కూల్స్‌ సన్నద్ధమవుతున్నాయి. జులై నుంచి సెప్టెంబర్‌ వరకు ఈ సెలవులు ఉంటాయి. ఈసారి సమ్మర్‌ హాలీడేస్‌లో ఈద్‌ హాలీడేస్‌ కూడా కలుస్తున్నాయి. ఇప్పటిదాకా పని వేళల్ని కుదించని స్కూళ్ళు రంజాన్‌ ప్రారంభం నుంచి పనివేళల్ని తగ్గించాలని, దానికి తగిన ఏర్పాట్లు చేసుకుంటున్నాయి. మే 15 నుంచి చాలా వరకు ఇండిపెండెంట్‌ స్కూల్స్‌ మంత్రిత్వ శాఖ ఆదేశాలతో పనివేళల్ని కుదించేశాయి. పనివేళల్ని 30 నిమిషాల నుంచి 60 నిమిషాల వరకు స్కూళ్ళు తగ్గించాయి. ఉష్ణోగ్రతల్లో పెరుగుదల ఈ సంవత్సరం గతంలో కన్నా ఎక్కువ ఉండవచ్చునని వాతావరణ శాఖ అంచనా వేస్తోంది. ఇప్పుడే 40 డిగ్రీలకు పైన దోహా సహా దేశంలోని పలు ప్రాంతాల్లో ఉష్ణోగ్రతలు నమోదవుతున్నాయి.