యూఏఈ: ఇటీవల దుబాయ్‌లో ఆల్కహాల్ లైసెన్స్ కొనుగోలుకు సంబంధించి చట్టాలను సడలించారు. గతంలో ఎమిరేట్‌లో పానీయాలపై విధించిన 30 శాతం పన్నును కూడా అధికారులు తొలగించారు.  అయితే, దుబాయ్‌లో మద్యం లైసెన్స్ ఉంటే మాత్రమే మద్యం కొనుగోలు చేయడానికి అనుమతి ఉంది. దుబాయ్‌లో ఆల్కహాల్ లైసెన్స్ పొందడం గురించి మీరు తెలుసుకోవలసిన కొన్ని వివరాలు.

ఎలా దరఖాస్తు చేయాలి?
దుబాయ్‌లో మద్యం లైసెన్స్ కోసం దరఖాస్తు చేయడానికి రెండు మార్గాలు ఉన్నాయి:
ఆఫ్‌లైన్: నివాసితులు ఆఫ్రికన్ ఈస్టర్న్ లేదా MMIకి వెళ్లి స్టోర్‌లో లైసెన్స్ కోసం దరఖాస్తు చేసుకోవచ్చు. దరఖాస్తుదారులు తప్పనిసరిగా 21 సంవత్సరాల కంటే ఎక్కువ వయస్సు కలిగి ఉండాలి. వారు స్టోర్‌లో ప్రదర్శించగలిగే చెల్లుబాటు అయ్యే ఎమిరేట్స్ IDని కలిగి ఉండాలి. దరఖాస్తుదారులు లైసెన్స్ కోసం దరఖాస్తు చేసిన తర్వాత ఆల్కహాల్ ను కొనుగోలు చేయవచ్చు.

ఆన్‌లైన్: దరఖాస్తుదారులు అధికారిక ఆఫ్రికన్ ఈస్టర్న్ వెబ్‌సైట్‌ను సందర్శించాలి. వెబ్‌సైట్‌లో కుడి ఎగువ మూలలో 'లైసెన్స్ కోసం దరఖాస్తు'పై క్లిక్ చేయాలి. ఆ తర్వాత, వారు ఒక ఫారమ్‌ను పూర్తిచేయాలి. అక్కడ వారి ఎమిరేట్స్ ID నంబర్‌తో సహా కొన్ని వ్యక్తిగత వివరాలను నమోదు చేయాలి.

ప్రాసెస్ విధానం..
లైసెన్స్ కోసం దరఖాస్తు చేసిన తర్వాత, దరఖాస్తుదారు వారి లైసెన్స్ పొందేందుకు రెండు నుండి ఐదు వారాల సమయం పట్టవచ్చు.

దరఖాస్తు ఫీ..
ఈ ఏడాది ప్రారంభంలో సవరించిన నిబంధనలలో భాగంగా దుబాయ్ ప్రభుత్వం లైసెన్స్‌ను పూర్తిగా ఉచితంగా పొందేలా చేసింది.

అర్హత..
దరఖాస్తుదారులు తప్పనిసరిగా 21+ వయసు ఉండాలి అలాగే చెల్లుబాటు అయ్యే ఎమిరేట్స్ ఇది కలిగివుండాలి.

నోట్..
పర్యాటకులు దుబాయ్‌లో వ్యక్తిగత మద్యం లైసెన్స్ కోసం కూడా దరఖాస్తు చేసుకోవచ్చు. దరఖాస్తు చేసేటప్పుడు వారు పాస్‌పోర్ట్‌ను సమర్పించాల్సి ఉంటుంది. ఇది తప్పనిసరిగా మరో రెండు నెలల పాటు చెల్లుబాటులో ఉండాలి. దరఖాస్తుదారులు కూడా 21 ఏళ్లు పైబడి ఉండాలి.

నిబంధనలు..
ఎమిరేట్‌లో ఆల్కహాల్ పానీయాలు తీసుకోవడం అనుమతించబడుతుంది. అయితే, ఈ క్రింది నియమాలను గుర్తుంచుకోవాలి.
1. దుబాయ్‌లో చట్టపరమైన మద్యపాన వయస్సు 21 సంవత్సరాలు.
2. బహిరంగంగా మద్యం సేవించడం నిషేధం. అలా చేస్తే చట్టపరంగా తీవ్ర పరిణామాలను ఎదుర్కొవాల్సి ఉంటుంది. 
3. ఎమిరేట్‌లో మద్యం సేవించి వాహనాలు నడపడం ఖచ్చితంగా నిషేధించబడింది. అటువంటి చర్యలకు వ్యతిరేకంగా జీరో-టాలరెన్స్ పాలసీ ఉంది.
4. నగరం అంతటా లైసెన్స్ పొందిన రెస్టారెంట్లు, లాంజ్‌లు మరియు బార్‌లలో మాత్రమే మద్యం సేవించే అవకాశం ఉంది.