మస్కట్: ఒమన్,ఇతర జిసిసి దేశాలలో నీట్ పరీక్షా కేంద్రాన్ని తొలగించడంపై కైరాలీ ఒమన్ సంఘం నేతృత్వంలోని భారతీయ పాఠశాల విద్యార్థుల తల్లిదండ్రులు ఒమన్‌లోని భారత రాయబారి అమిత్ నారంగ్‌కు మెమోరాండం సమర్పించారు. ఒమన్‌లోని భారతీయ పాఠశాలల విద్యార్థుల తల్లిదండ్రుల నిరంతర అభ్యర్థనల నేప‌థ్యంలో  ఇండియన్ స్కూల్ మస్కట్‌లో NEET కేంద్రాన్ని 2022లో ప్రారంభించింది. గత సంవత్సరాల్లో చాలా మంది తల్లిదండ్రుల నుండి వచ్చిన అభ్యర్థనల ఆధారంగా, కైరాలీ ఒమన్ సంఘం భారతదేశంలోని పార్లమెంటు సభ్యులకు మెమోరాండంలు ఇచ్చింది. ఇటువంటి సమిష్టి కృషి ఫలితంగా మస్కట్‌లోని ఇండియన్ స్కూల్‌లో నీట్ కేంద్రం ప్రారంభించారు. ప్రపంచవ్యాప్తంగా ఉన్న భారతీయ ప్రవాసుల కమ్యూనిటీ గ్రూపుల మద్దతుతో తమ నిరంతర ప్రయత్నాల ఫలితంగా ప్రారంభమైన ఈ కేంద్రం ఎటువంటి కారణం లేకుండా ఎత్తివేయ‌డంతో ఒమన్‌లోని తల్లిదండ్రులు నిరాశ పడుతున్నారు. మ‌రోవైపు నీట్ కోసం ఆన్‌లైన్ రిజిస్ట్రేషన్ ఇప్పటికే ప్రారంభమైంది. ఒమన్‌తో సహా గల్ఫ్ దేశాలలో పరీక్షా కేంద్రాలను ఆకస్మికంగా ర‌ద్దు చేయ‌డంతో విద్యార్థులు ఆందోళన చెందుతున్నారు. విద్యార్థుల భవిష్యత్తుకు తీవ్ర ముప్పు తెచ్చే ఈ నిర్ణయాన్ని ఉపసంహరించుకోవాలని, నీట్ పరీక్షా కేంద్రాన్ని వెంటనే పునరుద్ధరించాలని డిమాండ్ చేస్తూ కైరాలీ ఒమన్ కమ్యూనిటీతో పాటు తల్లిదండ్రుల బృందం ఒమన్‌లోని భారత రాయబారి అమిత్ నారంగ్‌ను కోరారు.