చాలా వరకు భిన్నమైన, వైవిధ్యమైన పాత్రలు, కథలను ఎంచుకుని నటిస్తుంటారు సూర్య. ఇటీవల విడుదలైన '24' కూడా ఓ ప్రయోగమనే చెప్పాలి. అందులో త్రిపాత్రాభినయంతో మెప్పించారు. హరి దర్శకత్వంలోని 'సింగం' సీరీస్‌ చిత్రాల్లో నటిస్తూ దక్షిణాది బాక్సాపీసును షేక్‌ చేస్తున్నారు. ప్రస్తుతం ఈ చిత్రానికి మూడోభాగం 'ఎస్‌ 3'గా తెరకెక్కుతోంది. త్వరలోనే ఈ సినిమా పాటలను విడుదల చేయడానికి సన్నాహాలు చేస్తున్నారు. ఇదిలా ఉండగా ప్రస్తుతం ఓ చారిత్రాత్మక చిత్రంలో నటించడానికి ఆయన అంగీకరించినట్లు సమాచారం. నిన్నటి వరకు 'అరణ్మనై', 'అరణ్మనై 2' చిత్రాలతో దెయ్యాల ట్రెండ్‌ చుట్టూ తిరిగిన సుందర్‌.సి చారిత్రాత్మక కథతో సూర్య వద్దకు వెళ్లినట్లు తెలుస్తోంది.కథ నచ్చడంతో సూర్య నటించడానికి ఒప్పుకున్నారని, ప్రస్తుతం డేట్స్‌ తీసుకునే పనిలో నిర్మాణ సంస్థ ఉందని ప్రచారం సాగుతోంది. మరోవైపు ఇందులో కథానాయిక పాత్ర కోసం దీపికాపదుకొనేతో చర్చలు జరుపుతున్నారు. త్వరలోనే దీనికి సంబంధించిన అధికారిక సమాచారం విడుదల కానుంది. కమల కన్నన్‌ ఈ చిత్రానికి వీఎఫ్‌ఎక్స్‌ సమకూర్చనున్నారు.