అబుదాబి: అబుదాబి పోలీసులు "సేఫ్ సమ్మర్" ప్రచారాన్ని ప్రారంభించారు. యూఏఈలో వేసవి నెలలలో భద్రతను పెంచే సురక్షితమైన డ్రైవింగ్ కోసం 6 ముఖ్యమైన మార్గదర్శకాలకు కట్టుబడి ఉండాలని డ్రైవర్లకు పిలుపునిచ్చారు. వాహనాల్లో లిక్విడ్ ఇంధనాల స్థాయిల తనిఖీ,   భద్రతా సాధనాలు అందుబాటులో ఉన్నాయని నిర్ధారించుకోవడం, స్టీరింగ్ వీల్ వేడిగా ఉన్నప్పుడు డ్రైవింగ్ చేయకూడదు, వాహనం టైర్ ఒత్తిడి, పరిస్థితిని తరచూ నిర్ధారించుకోవడం, కారు లోపల మండే స్వభావం ఉన్న వస్తువులను ఉంచవద్దు, నీడ ఉన్న ప్రదేశాలలో కారును పార్కింగ్ చేయాలని సూచించారు.

గత సంవత్సరంలో రవాణాలో 1,396 అగ్నిప్రమాదాలు సంభవించాయని అంతర్గత మంత్రిత్వ శాఖ వెల్లడించింది. అబుదాబిలో 264, దుబాయ్‌లో 326, షార్జాలో 231, అల్ ఐన్‌లో 195, రస్ అల్ ఖైమాలో 102, అజ్మాన్‌లో 109, ఫుజైరాలో 85, అల్ దఫ్రాలో 45, ఉమ్ అల్ ఖువైన్‌లో 31 అగ్నిప్రమాదాలు సంభవించాయి.  కమ్యూనిటీ భద్రతను పెంపొందించడానికి, సురక్షితమైన మరియు స్థిరమైన వాతావరణాన్ని అందించడానికి ఫోన్ సర్వీస్ 8002626 ద్వారా భద్రతా సమాచారాన్ని నివేదించాలని లేదా 2828 నంబర్‌కు మెసేజ్ పంపాలని అబుదాబి పోలీసులు ప్రజలకు పిలుపునిచ్చారు.