మనకు బరువు తగ్గించే ఆహారం గురించి తెలుసు. కానీ నవ్వించే ఆహారం గురించి విన్నారా? పళ్లని మిలమిలా మెరిపించే ఆహారం చక్కగా నవ్వించేదే కదా మరి..! అలాంటివే ఇవి..
స్ట్రాబెర్రీలు: దోరగా లేదా పండిన స్ట్రాబెర్రీల్లో మాలిక్‌ ఆమ్లం ఉంటుంది. ఇది దంతాలని మెరిపిస్తుంది. వీటిలోని శక్తిమంతమైన యాంటీఆక్సిడెంట్లు పళ్లపై మరకలకి కారణమైన బ్యాక్టీరియాని అదుపు చేస్తాయి. చిగురు వాపు రాకుండా నివారిస్తాయి.
అనాస: దంతాలను సహజంగా శుభ్రపరిచి, దంతాలని మెరిపించే గుణం ఉన్న పండు అనాస. ఇందులోని బ్రొమిలైన్‌ సహజసిద్ధ క్లెన్సర్‌గా పనిచేస్తుంది.
క్యారెట్‌:
క్యారెట్‌ని హల్వాగానో, జ్యూస్‌లా చేసుకోవడం కంటే చక్కగా శుభ్రం చేసి పచ్చిగా తినడం మంచిది. పళ్లపై ఇతర పదార్థాల కారణంగా పేరుకున్న బ్యాక్టీరియా, వ్యర్థాలని ఇది తొలగిస్తుంది. పళ్లకి తగిన వ్యాయామం అంది చిగుళ్లూ బలపడతాయి.
కాలీఫ్లవర్‌: చక్కని పోషకాలు నిండిన కాలీఫ్లవర్‌ వ్యాధినిరోధక శక్తిని పెంచడంతోపాటూ దంతాలనీ చక్కగా మెరిపిస్తుంది. ఇందులో పీచు ఎక్కువ కాబట్టి తినేటప్పుడు నోట్లో లాలాజలం వూరుతుంది. దంతాల ఎనామిల్‌పై మరకలు పడకుండా చూస్తుంది.
పెరుగు: పెరుగూ, జున్నూ కూడా దంతాలని మెరిపిస్తాయి. క్యాల్షియం, మాంసకృత్తులు అధికంగా ఉండే పదార్థాలు కాబట్టి దంతాలపై ఉండే ఎనామిల్‌ను కాపాడుతుంటాయి. వీటిల్లోని లాక్టిక్‌ యాసిడ్‌ దంతాలకి తగిన రక్షణ ఇస్తుంది. పెరుగులోని పాస్ఫరస్‌ పళ్లపై ఆమ్లాలు పేరుకోకుండా చూసి రంగు మారకుండా కాపాడుతుంది.