రియాద్: సౌదీ అరేబియాలోని చాలా ప్రాంతాలలో నవంబర్ 9వతేదీ (శనివారం) వరకు ఉరుములు, మెరుపులతో కూడిన భారీ వర్షాలు కొనసాగే అవకాశం ఉన్నందున ప్రజలు అత్యంత జాగ్రత్తగా ఉండాలని, అప్రమత్తంగా ఉండాలని పౌర రక్షణ శాఖ జనరల్ డైరెక్టరేట్ హెచ్చరించింది. వరదలు వచ్చే అవకాశం ఉన్న లోయ ప్రాంతాలకు దూరంగా ఉండాలని సూచించింది.  

మక్కా ప్రాంతంలో తేలికపాటి నుండి భారీ వర్షాలు కురుస్తాయని, దీని కారణంగా ఆకస్మిక వరదలు, తీవ్రమైన గాలులకు దారితీయవచ్చని తెలిపింది. హేల్, తబుక్, అల్-జౌఫ్, ఉత్తర సరిహద్దులు, అసిర్, జజాన్ ప్రాంతాల్లో భారీ వర్షాలు కురుస్తాయని..తూర్పు ప్రావిన్స్, అల్-బహా, మదీనా, ఖాసిం, నజ్రాన్ ప్రాంతాలలో తేలికపాటి నుండి భారీ వర్షాలు కురుస్తాయని డైరెక్టరేట్ తెలిపింది.