యూఏఈ: దుబాయ్‌లోని అల్ సబ్‌ఖా ప్రాంతంలో 350 పార్కింగ్ స్లాట్లతో కూడిన ఏడు అంతస్తుల స్మార్ట్ పార్కింగ్ సదుపాయాన్ని నిర్మించనున్నారు. ఈ మేరకు పబ్లిక్ పార్కింగ్ ఆపరేటర్ పార్కిన్ కంపెనీ ప్రకటించింది. రద్దీగా ఉండే దీరా జిల్లాలో ఉన్న ఈ ప్రాంతంలో కొత్త మల్టీ లెవెల్ కార్ పార్క్ అభివృద్ధికి దుబాయ్ ఎండోమెంట్స్ అండ్ మైనర్స్ ట్రస్ట్ ఫౌండేషన్ (అవుకాఫ్ దుబాయ్)తో అవగాహన ఒప్పందం కుదుర్చుకున్నట్లు తెలిపారు. ఈ పార్కింగ్ సదుపాయం సుమారు 175,000 చదరపు అడుగుల విస్తీర్ణంలో ఉంటుందని, మరో 9,600 చదరపు అడుగుల గ్రౌండ్ ఫ్లోర్‌లో రిటైల్ స్టోర్లకు కేటాయించినట్టు వెల్లడించింది.ప్లానింగ్ ఆమోదానికి లోబడి, నిర్మాణం 2025 రెండవ అర్ధభాగంలో ప్రారంభమవుతుంది.దీని నిర్మాణ సమయం సుమారు రెండు సంవత్సరాలు ఉంటుందని పార్కిన్ తెలిపింది.