యూఏఈ: ఫ్లూ లాంటి లక్షణాలను కలిగించే శ్వాసకోశ వైరస్ అయిన హ్యూమన్ మెటాప్న్యూమోవైరస్ (HMPV) కేసుల సంఖ్య చైనాలో పెరుగుతోంది. ఈ నేపథ్యంలో పరిస్థితిని పర్యవేక్షిస్తున్నట్లు యూఏఈలోని వ్యాధి నియంత్రణ అథారిటీ స్పష్టం చేసింది. ముఖ్యంగా న్యుమోనియా వ్యవస్థను పర్యవేక్షిస్తున్నట్లు తెలిపింది. సాధారణంగా వింటర్ లో కొన్ని శ్వాసకోశ వ్యాధుల కేసులు పెరుగుతాయని భావిస్తున్నారు.

కోవిడ్-19 మహమ్మారి తర్వాత ఐదు సంవత్సరాల తర్వాత HMPV వేగంగా వ్యాప్తి చెందుతోందని నివేదికలు సూచిస్తున్నాయి. చైనా తర్వాత, మలేషియాలో ఇటీవల కేసుల సంఖ్య గణనీయంగా పెరుగుతోంది. ఇదిలా ఉండగా, భారత్‌లోనూ కేసులు నమోదయ్యాయి.

HMPV అంటే ఏమిటి?
హ్యూమన్ మెటాప్న్యూమోవైరస్ అనేది శ్వాసకోశ వ్యాధి. ఇది సాధారణ జలుబు, ఇన్ఫ్లుఎంజా వంటి లక్షణాలను కలిగిస్తుంది. అనారోగ్యం సాధారణంగా స్వల్పంగా ఉన్నప్పటికీ, ఇది న్యుమోనియా వంటి తీవ్రమైన సమస్యలకు దారితీస్తుంది. ముఖ్యంగా శిశువులు, వృద్ధులు మరియు బలహీనమైన రోగనిరోధక వ్యవస్థలు ఉన్నవారిలో తీవ్ర నష్టాన్ని కలిగిస్తుంది.

HMPV ఉందో లేదో తెలుసుకోవడం ఎలా?
HMPV లక్షణాలు.. దగ్గు, జ్వరం, ముక్కు కారడం, శ్వాస ఆడకపోవడం,  గొంతు నొప్పి. ఇవి సాధారణంగా కనిపించిన మూడు నుండి ఆరు రోజుల తర్వాత బయటపడతాయి. కొన్ని సందర్భాల్లో HMPV వల్ల కలిగే తీవ్రమైన అనారోగ్యం ఆసుపత్రిలో చేరవలసి ఉంటుంది. ఇంక్యుబేషన్ పీరియడ్ 3 నుండి 6 రోజులు. వ్యాధి తీవ్రత వైరస్‌ల వల్ల కలిగే ఇతర శ్వాసకోశ ఇన్‌ఫెక్షన్‌ల మాదిరిగానే ఉంటుందని వైద్య నిపుణులు తెలిపారు.

HMPV తీవ్రమైన వ్యాధి కాదా?
HMPV సోకిన చాలా మంది రోగులు కొద్ది రోజుల్లోనే ఇంట్లోనే కోలుకుంటారు. ఎక్కువ కేసులలో తేలికపాటి లక్షణాలే ఉంటాయి. అయినప్పటికీ, క్లీవ్‌ల్యాండ్ క్లినిక్ ప్రకారం.. చిన్న పిల్లలు, 65 ఏళ్లు పైబడిన పెద్దలు మరియు బలహీనమైన రోగనిరోధక వ్యవస్థ కలిగిన వ్యక్తులు తీవ్రమైన అనారోగ్యానికి గురయ్యే ప్రమాదం ఉంది. HMPV తో మొదటి ఇన్ఫెక్షన్ తీవ్రమైన అనారోగ్యానికి కారణమయ్యే అవకాశం ఉంది. అందుకే చిన్నపిల్లలకు ఎక్కువ ప్రమాదం ఉంటుంది. మొదటి వ్యాధి వచ్చిన తర్వాత, వ్యక్తులు కొంత రోగనిరోధక శక్తిని పొందుతారు. ఇది సాధారణంగా తదుపరి ఇన్ఫెక్షన్లలో తేలికపాటి, జలుబు వంటి లక్షణాలకు దారితీస్తుందని నిపుణులు అన్నారు.

HMPV ఎలా సంక్రమిస్తుంది?
HMPV సోకిన వ్యక్తితో డైరెక్ట్ కాంటాక్ట్ ద్వారా వ్యాపిస్తుంది. కలుషితమైన ఉపరితలాలను తాకడం, దగ్గడం, తుమ్మడం లేదా కరచాలనం చేయడం ద్వారా కూడా ఇది వ్యాపిస్తుంది. లక్షణాలు తీవ్రమైతే..  తీవ్రమైన దగ్గు, శ్వాసలో గురక , శ్వాస ఆడకపోవడం వంటివి కనిపిస్తాయి. ఈ సందర్భాలలో తక్షణమే వైద్య సహాయం పొందాలి.

యాంటీబయాటిక్స్ అవసరమా?
ప్రస్తుతం, HMPV నిరోధించడానికి టీకా లేదు. చికిత్స ఎక్కువగా లక్షణాలను తగ్గించడానికి మాత్రమే మెడికేషన్ అందుబాటులో ఉంది. lung.org ప్రకారం.. నొప్పి, జ్వరాన్ని నియంత్రించడానికి ఓవర్-ది-కౌంటర్ మందులు, డీకాంగెస్టెంట్‌తో పాటు ఉపశమనాన్ని అందిస్తాయి.

నివారణ
HMPV మరియు ఇతర శ్వాసకోశ వైరస్‌ల వ్యాప్తిని నిరోధించడం కోసం..
-కనీసం 20 సెకన్ల పాటు తరచుగా సబ్బు, నీటితో చేతులు కడుక్కోవాలి.
-కడుక్కోని చేతులతో కళ్లు, ముక్కు లేదా నోటిని తాకవద్దు.
-అనారోగ్యంతో ఉన్న వ్యక్తులకు దూరంగా ఉండాలి.
-జలుబు వంటి లక్షణాలు ఉన్న రోగులు దగ్గినప్పుడు, తుమ్మేటప్పుడు నోరు, ముక్కును గుడ్డతో కప్పుకోవాలి.
-ఇతరులతో కప్పులు, పాత్రలు షేర్ చేసుకోవద్దు.
-అనారోగ్యంగా ఉన్నప్పుడు ఇంట్లోనే ఉండాలి.

గమనిక: మరింత సమాచారం, చికిత్స కోసం వైద్యులను సంప్రదించాలి.