సుల్తాన్‌ కుబూస్‌ యూనివర్సిటీ (ఎస్‌క్యుయు), 675 ఫొటోవాల్టిక్‌ ప్యానెల్స్‌ని ఇన్‌స్టాల్‌ చేయాలనుకుంటోందని యూనివర్సిటీ కాలేజ్‌ ఆఫ్‌ ఇంజనీరింగ్‌ డీన్‌ డాక్టర్‌ అబ్దుల్లా హమాద్‌ అల్‌ బాది చెప్పారు. ఇందుకోసం 216,000 ఒమన్‌ రియాల్స్‌ ఖర్చు చేయనున్నారు. పర్యావరణ హితమైన ప్రాజెక్టులో భాగంగా ఈ ఆలోచనను అమల్లోకి తీసుకువస్తున్నారు. యూనివర్సిటీకి చెందిన విద్యార్థులు, సోలార్‌ ప్యానెల్స్‌ని రూఫ్‌ టాప్‌పై ఏర్పాటు చేయడం కన్నా, పార్కింగ్‌ లాట్స్‌లో ఏర్పాటు చేయడం ఉత్తమమని నిరూపించడంతో ఆ దిశగా చర్యలు చేపట్టామని ఆయన వివరించారు. సూర్యకాంతిని ఫోటోవాల్టిక్‌ ప్యానెల్స్‌ స్వీకరించి, ఆ కిరణాల్ని ఎలక్ట్రిక్‌ ఎనర్జీగా మార్చుతాయి. భౌగోళికంగా ఒమన్‌కి ఉన్న ప్రత్యేకతల నేపథ్యంలో జులైలో 5,500 నుంచి 6,000 కిలోవాట్స్‌ శక్తిని, అలాగే జనవరిలో 2,500-3000 కిలోవాట్స్‌ శక్తిని చదరపు మీటర్‌కి తయారుచేయగలవని ఆయన చెప్పారు. ఏడాదిలో 340 రోజులపాటు సూర్యకాంతి అందుబాటులో ఉంటుంది ఒమన్‌లో. యూనివర్సిటీ, అంతర్జాతీయ రీసెర్చ్‌ ఇన్‌స్టిట్యూట్స్‌తో కలిసి చేసిన ప్రయోగాల్ని ఒమన్‌ కోసం వినియోగిస్తున్నామని డాక్టర్‌ బాది చెప్పారు.