డమాస్కస్: సిరియా పునరుద్ధరణకు మద్దతు ఇవ్వడానికి సిద్ధంగా ఉన్నట్టు సౌదీ అరేబియా విదేశాంగ మంత్రి ప్రిన్స్ ఫైసల్ బిన్ ఫర్హాన్ పునరుద్ఘాటించారు. అదేసమయంలో సిరియాపై విధించిన ఆంక్షలను ఎత్తివేయడానికి చర్యలను వేగవంతం చేసినట్టు తెలిపారు.  ఆంక్షలను ఎత్తివేయడం గురించి సౌదీ అరేబియా సంబంధిత దేశాలతో చురుకుగా చర్చలు జరుపుతోందని ప్రిన్స్ ఫైసల్ పేర్కొన్నారు. ఈ విషయంలో సానుకూల సంకేతాలు అందుతున్నాయని కూడా ఆయన వెల్లడించారు. దేశ సార్వభౌమాధికారం, స్వాతంత్ర్యం, ప్రాదేశిక సమగ్రతకు మద్దతు ఇవ్వడం ప్రాముఖ్యతను చెబుతూ.. సిరియన్లు ఐక్యంగా ఉన్నంత కాలం సిరియా తన ప్రముఖ స్థానాన్ని తిరిగి పొందగలదని ప్రిన్స్ ఫైసల్ పేర్కొన్నారు. ప్రస్తుతం క్లిష్టమైన దశలో ఉన్న సిరియన్ ప్రజల సామర్థ్యంపై ప్రిన్స్ ఫైసల్ విశ్వాసం వ్యక్తం చేశారు.