ఐఎస్ఐఎస్ సానుభూతిపరులు హైదరాబాద్‌ నగరంలో పేలుళ్లకు కుట్ర పన్నారన్న వార్తల నేపథ్యంలో పోలీసులు అప్రమత్తమయ్యారు. పాతబస్తీ ప్రాంతంలో ఎన్‌ఐఏ బృందం అదుపులోకి తీసుకున్న ఐఎస్ఐఎస్ సానుభూతిపరుల నుంచి స్వాధీనం చేసుకున్న పేలుడు పదార్థాలు, రసాయనాల, నగదుతో పాటు గచ్చిబౌలికి చెందిన రెండు మ్యాప్‌లు కూడా ఉన్నట్లు తెలుస్తోంది. ఇనార్బిట్‌ మాల్‌తో పాటు జనసమ్మర్థ ప్రాంతాల్లో పేలుళ్లకు కుట్ర పన్నినట్లు బహిర్గతం కావడంతో పోలీసులు గురువారం సోదాలు నిర్వహించారు. గచ్చిబౌలిలోని ఇనార్బిట్‌ మాల్‌తో పాటు లాడ్జీలు, ఫంక్షన్‌ హాళ్లు, పర్యాటక ప్రాంతాలను జల్లెడ పడుతున్నారు. మాదాపూర్‌ డీసీపీ కార్తికేయ నేతృత్వంలో పోలీసులు బృందాలుగా విడిపోయి తనిఖీలు చేస్తున్నారు.