భారత క్రికెట్‌ మాజీ కెప్టెన్‌, టీమ్‌ ఇండియా డైరెక్టర్‌ రవిశాస్త్రి ఐసీసీలోని ఉన్నత పదవికి రాజీనామా చేశారు. ప్రస్తుతం ఆయన ఐసీసీలో మీడియా విభాగ అధికార ప్రతినిధిగా ఉన్నారు. భారత క్రికెట్‌ ప్రధాన కోచ్‌ పదవి కోసం ఆయనను ఇంటర్వ్యూ చేసిన బృందంలో గంగూలీ లేకపోవడాన్ని రవిశాస్త్రి తప్పుపట్టిన సంగతి తెలిసిందే. ఈ విషయంలో గంగూలీ-రవిశాస్త్రిల మధ్య మీడియా వేదికగా తీవ్రస్థాయిలో మాటల యుద్ధం జరిగింది. ఈ నేపథ్యంలో శాస్త్రి రాజీనామా నిర్ణయం ప్రాధాన్యం సంతరించుకుంది.
'నేను ఇప్పటికే ఐసీసీకి రాజీనామా సమర్పించాను. ఆరేళ్ల నుంచి నేను ఆ పదవిలో కొనసాగుతున్నాను. రాజీనామా పూర్తిగా నా వ్యక్తిగత నిర్ణయం' అని రవిశాస్త్రి స్పష్టం చేశారు. అయితే ఆయన ఇప్పటికే వ్యాఖ్యతగా, క్రికెట్‌ నిపుణుడిగా, కాలమిస్ట్‌గా వివిధ పాత్రలు పోషిస్తూ తీరిక లేకుండా గడుపుతున్నారు. దీంతో ఐసీసీ పదవికి రాజీనామా చేయాలని రవిశాస్త్రి నిర్ణయం తీసుకున్నట్లు సమాచారం.