యూఏఈ: దుబాయ్ క్రౌన్ ప్రిన్స్ షేక్ హమ్దాన్ మొదటి భారత్ పర్యటన తర్వాత కీలక కార్యక్రమాలను ప్రకటించారు. బ్లూ-కాలర్ కార్మికులకు సమగ్రమైన, అందుబాటులో ఉండే ఆరోగ్య సంరక్షణను అందించడానికి యూఏఈ-ఇండియా ఫ్రెండ్‌షిప్ హాస్పిటల్ (UIFH) దుబాయ్‌లో స్థాపించనున్నారు. ఈ ఆసుపత్రిని దుబాయ్ హెల్త్, ఆసుపత్రి వ్యవస్థాపక ట్రస్టీలుగా వ్యవహరించే ఐదుగురు భారతీయ వ్యవస్థాపకుల బృందం సమిష్టిగా స్థాపించనున్నాయి. ముంబైలోని దుబాయ్ ఛాంబర్స్ నిర్వహించిన ప్రత్యేక కార్యక్రమంలో ఈ వ్యాపారవేత్తలు ,దుబాయ్ హెల్త్ సీఈఓ డాక్టర్ అమెర్ షరీఫ్ ఒక ఒప్పందంపై సంతకం చేశారు.

UIFH వ్యవస్థాపక ట్రస్టీలలో KEF హోల్డింగ్స్ చైర్మన్ ఫైజల్ కొట్టికోల్లన్, అపెరల్ గ్రూప్ చైర్మన్ నీలేష్ వేద్, బ్యూమెర్క్ కార్పొరేషన్ ఎగ్జిక్యూటివ్ చైర్మన్ సిద్ధార్థ్ బాలచంద్రన్, EFS ఫెసిలిటీస్ వైస్ చైర్మన్ తారిక్ చౌహాన్, ట్రాన్స్‌వరల్డ్ గ్రూప్ చైర్మన్ రమేష్ ఎస్ రామకృష్ణన్ ఉన్నారు. వ్యవస్థాపకులందరూ యూఏఈ ఇండియా బిజినెస్ కౌన్సిల్-UAE చాప్టర్ (UIBC UC) సభ్యులు. షేక్ హమ్దాన్ సందర్శనను రెండు దేశాల మధ్య సంబంధాలకు "స్మారక చిహ్నం"గా సిద్ధార్థ్ బాలచంద్రన్ అభివర్ణించారు.  

దుబాయ్ క్రౌన్ ప్రిన్స్ తన పర్యటనలో భాగంగా మౌలిక సదుపాయాలు, ఆరోగ్య సంరక్షణ, ఉన్నత విద్య, సముద్ర సేవలు, లాజిస్టిక్స్ వంటి కీలక రంగాలలో సహకారాన్ని మరింతగా పెంచే లక్ష్యంతో భారత వాణిజ్య, పరిశ్రమల మంత్రి పియూష్ గోయల్ తో కలిసి ఎనిమిది అవగాహన ఒప్పందాలపై సంతకాలు చేశారు. ముంబైలో దుబాయ్ ఛాంబర్స్ నిర్వహించిన ప్రత్యేక కార్యక్రమంలో ఈ అవగాహన ఒప్పందాలు కుదుర్చుకున్నారు.