రియాద్ః  రియాద్ ఇన్‌ఫ్రాస్ట్రక్చర్ ప్రాజెక్ట్స్ సెంటర్ ఒక కొత్త ఆటోమేటెడ్ సేవను ప్రారంభించింది.  ఇది సమీపంలోని అంతర్గత రహదారులపై మౌలిక సదుపాయాల పనులు ప్రారంభం అయ్యే సమయంలో నివాసితులు, వ్యాపార యజమానులకు SMS ద్వారా తెలియజేస్తుంది. కొత్త “పని ప్రారంభ హెచ్చరికలు” సేవ ట్రాఫిక్ ప్రవాహాన్ని లేదా నీరు, విద్యుత్, టెలికమ్యూనికేషన్‌ల వంటి ముఖ్యమైన సేవలను ప్రభావితం చేసే ప్రాజెక్టులపై సకాలంలో మరియు పారదర్శక నవీకరణలను అందించడం లక్ష్యంగా పెట్టుకుంది. దాంతో నివాసితులు ముందుగానే ప్లాన్ చేసుకోవచ్చు. అవసరమైనప్పుడు ప్రత్యామ్నాయ మార్గాలను ఎంచుకోవచ్చు. మౌలిక సదుపాయాల ప్రాజెక్టులకు సంబంధించిన ఫిర్యాదులు, విచారణలను ముందస్తుగా తగ్గించడానికి డిజిటల్ పరిష్కారాలను ఉపయోగించుకునే విస్తృత ప్రయత్నంలో ఈ చొరవ భాగమని తెలిపింది. రియాద్ ప్రాంతంలోని పౌరులు, నివాసితులు,  సందర్శకులకు ఎక్కువ పారదర్శకతతో రియల్ టైమ్ సమాచారాన్ని అందించడం ఈ హెచ్చరికల లక్ష్యమని వెల్లడించింది.