యూఏఈ: మిడిలీస్ట్ లో పెరుగుతున్న  ప్రాంతీయ ఉద్రిక్తతలు, గగనతల మూసివేతలతో చాలా మంది యూఏఈ నివాసితులు జార్జియా, అర్మేనియా, అజర్‌బైజాన్, జోర్డాన్, లెబనాన్ వంటి గమ్యస్థానాలతో సహా కాకసస్, మధ్యప్రాచ్యానికి వారి వేసవి సెలవులను రద్దు చేసుకుంటున్నారు.

ఇరాన్-ఇజ్రాయెల్ వివాదం కారణంగా ఏర్పడిన అనిశ్చితి చాలా మందికి ప్రయాణ ప్రణాళికలను దెబ్బతీసింది. గగనతలం మూసివేయడంతో, విమానాలు ఆలస్యం అయ్యాయి లేదా రద్దు చేయబడ్డాయి.  "ప్రజలు తమ ప్రణాళికలను వాయిదా వేస్తున్నారు లేదా పూర్తిగా రద్దు చేసుకుంటున్నారు" అని వైజ్‌ఫాక్స్ టూరిజం సీనియర్ మేనేజర్ సుబైర్ థెకేపురథ్వలప్పిల్ అన్నారు. ప్రయాణికులు వేచి ఉండటానికి బదులుగా రీఫండ్‌లను ఎంచుకుంటున్నారని తెలిపారు. నియో ట్రావెల్ అండ్ టూరిజం మేనేజింగ్ డైరెక్టర్ అవినాష్ అద్నాని మాట్లాడుతూ.. ప్రస్తుతం చాలా మంది ప్రయాణికులు టికెట్ రద్దు చేసుకుంటున్నారని, రీఫండ్ కోరుతున్నారని తెలిపారు.  

ట్రావెల్ ఏజెంట్ల ప్రకారం..కొన్ని సందర్భాల్లో విమానయాన సంస్థలు పూర్తి వాపసులను అందిస్తున్నాయి. ఒక విమానయాన సంస్థ మీ విమానాన్ని రద్దు చేసుకుంటే, మీరు సాధారణంగా పూర్తి వాపసుకు అర్హులు లేదా మీ ప్రయాణ తేదీలను ఉచితంగా మార్చుకోవచ్చు అని వారు చెప్పారు. “కొన్ని విమానయాన సంస్థలు తరువాతి తేదీలో ఉపయోగించడానికి ప్రయాణ వోచర్‌లను కూడా ఇస్తున్నాయి” అని సుబైర్ అన్నారు.అయితే, విమాన సర్వీసులు నడుస్తున్నప్పుడు ప్రయాణాన్ని మీరే రద్దు చేసుకుంటే, సాధారణ రద్దు నియమాలు వర్తిస్తాయన్నారు.