సలాలా: సలాలా అగ్రిటూరిజం ప్రాజెక్టు జనాన్ సలాలాలో గణనీయమైన పురోగతి ఉందని ఒమన్ పర్యాటక అభివృద్ధి సంస్థ ప్రకటించింది.  వ్యవసాయ ఆధారిత పెట్టుబడులతో స్థిరమైన పర్యాటకాన్ని అనుసంధానించడం ద్వారా ఆర్థిక వ్యవస్థను వైవిధ్యపరచడానికి ఒమన్ విస్తృత వ్యూహంలో ఈ ప్రాజెక్ట్ భాగమని తెలిపారు. కొనసాగుతున్న అభివృద్ధి పనులను ధోఫర్ గవర్నర్ హెచ్.హెచ్. సయ్యద్ మర్వాన్ బిన్ తుర్కి అల్ సయీద్ సమీక్షించారు. ఆయన వెంట వ్యవసాయ, జల వనరుల మంత్రి డాక్టర్ సౌద్ బిన్ హమౌద్ అల్ హబ్సి, సీనియర్ అధికారులు ఉన్నారు.

క్షేత్రస్థాయిలో పర్యటించి పలు సూచనలు చేశారు. వ్యవసాయ పర్యాటక లక్ష్యాలకు అనుగుణంగా ఉండేలా ప్రకృతి దృశ్యంగా సైట్‌ను తీర్చిదిద్దాలని ఆదేశించారు. 5.5 మిలియన్ చదరపు మీటర్లకు పైగా విస్తరించి ఉన్న ఈ ప్రాజెక్ట్ మాస్టర్‌ప్లాన్ వ్యవసాయ ఆధారిత వసతులు, కొబ్బరి, బొప్పాయి ప్రాసెసింగ్ సౌకర్యాలు, విద్యా - వినోద ప్రాంతాలు, రిటైల్ గ్రామం వంటి వాటిని కలిగిఉంటుంది.   ఈ ప్రాజెక్ట్ వారసత్వ, పర్యాటక మంత్రిత్వ శాఖ నుండి ఇంటిగ్రేటెడ్ టూరిజం కాంప్లెక్స్ (ITC) లైసెన్స్‌ను పొందిందని వెల్లడించారు.