మాంట్రియల్: ఒమన్ ఎయిర్ సర్వీసులు మరో మూడు దేశాలకు విస్తరించారు. ఈ మేరకు ఒమన్ పౌర విమానయాన అథారిటీ (CAA) సిరియా, గయానా,  కోట్ డి'ఐవోర్ దేశాలతో ఒప్పందం చేసుకుంది.  కెనడాలోని మాంట్రియల్‌లో జరిగిన అంతర్జాతీయ పౌర విమానయాన సంస్థ (ICAO) అసెంబ్లీ 42వ సెషన్ సందర్భంగా ఈ ఒప్పందాలపై సంతకాలు చేశారు.

పౌర విమానయానంలో సహకారాన్ని పెంపొందించడం, జాతీయ విమానయాన సంస్థల నిర్వహణ హక్కులను విస్తరించడం లక్ష్యంగా ఈజిప్ట్‌తో కూడా ఒక అవగాహన ఒప్పందం  చేసుకున్నట్లు అథారిటీ వెల్లడించింది.  

ఒమన్ తరపున పౌర విమానయాన అథారిటీ అధ్యక్షుడు నైఫ్ బిన్ అలీ అల్ అబ్రీ ఈ ఒప్పందాలపై సంతకాలు చేశారు. ఈ ఒప్పందాలు జాతీయ లక్ష్యాలకు మద్దతుగా నిలుస్తాయని అన్నారు. భాగస్వామి దేశాలతో ఆర్థిక మరియు వాణిజ్య సంబంధాలను పెంపొందించడంలో, ప్రాంతీయ లాజిస్టిక్స్ హబ్‌గా తన స్థానాన్ని బలోపేతం చేసుకోవడానికి ఒమన్ చేస్తున్న ప్రయత్నాలను ప్రతిబింబిస్తున్నాయని ఆయన చెప్పారు.

మాంట్రియల్‌ వేదికగా కుదిరిన ద్వైపాక్షిక ఒప్పందాలు ఒమన్ మరియు సంబంధిత దేశాల మధ్య విమాన రవాణా సంబంధాలను మెరుగుపరుస్తాయని అన్నారు.  ఒమన్ ప్రస్తుతం ప్రపంచవ్యాప్తంగా 130 దేశాలకు విమాన సేవలు అందుబాటులో ఉన్నాయి.