మస్కట్: స్టాండర్డ్ & పూర్స్ (S&P) ఒమన్ ఇన్వెస్ట్‌మెంట్ గ్రేడ్ క్రెడిట్ రేటింగ్‌ను 'BBB-' గా పేర్కొంది. క్రూడాయిల్ ధరల హెచ్చుతగ్గులు ఉన్నప్పటికీ ఆర్థిక స్థిరత్వాన్ని కొనసాగించే సామర్థ్యాన్ని ఇది హైలైట్ చేస్తుందని తెలిపింది. ప్రభుత్వ రంగంలోని సంస్థల పునర్నిర్మాణం, ఆదాయ వనరుల వైవిధ్యీకరణ మరియు ఒమన్ ఫ్యూచర్ ఫండ్ ప్రారంభంతో సహా ప్రభుత్వ సంస్కరణలు ఆర్థిక వ్యవస్థను బలోపేతం చేయడానికి, విదేశీ పెట్టుబడులను ఆకర్షించడానికి దోహదపడ్డాయని నివేదికలో వివరించారు.

చమురుయేతర రంగాలలో వృద్ధి మద్దతుతో స్థిరమైన ధరల వద్ద GDP వృద్ధి 2024లో 1.7 శాతం నుండి 2025-2028లో 2 శాతం కంటే ఎక్కువగా ఉంటుందని ఏజెన్సీ అంచనా వేస్తోంది. 2025 ద్వితీయార్థంలో బ్రెంట్ ముడి చమురు సగటు ధర బ్యారెల్‌కు 60 డాలర్ల నుండి 2026–2028లో బ్యారెల్‌కు 65 డాలర్లకి పెరుగుతుందని అంచనా వేసింది.  ప్రభుత్వ రుణం 2024లో 36 శాతం నుండి 2028 నాటికి 33 శాతానికి తగ్గుతుందని తెలిపింది. 2025-2028 సంవత్సరాల్లో ద్రవ్యోల్బణం సగటున 1.5 శాతం వద్ద తక్కువగా ఉంటుందని ఏజెన్సీ అంచనా వేస్తోంది.