యూఏఈ: అబుదాబిలో ఇంట్లో చలి మంటలు వేసుకొని ఐదుగురు వ్యక్తులు అస్వస్థతకు గురయ్యారు. కాగా, రెస్క్యూ టీమ్ సకాలంలో స్పందించడంతో ప్రాణనష్టం జరగలేదని అబుదాబి పోలీసులలోని క్రిమినల్ సెక్యూరిటీ సెక్టార్ డైరెక్టర్ మేజర్ జనరల్ మొహమ్మద్ సుహైల్ అల్ రష్ది తెలిపారు. మూసివేసిన ప్రదేశాలలో మంటలు వేసుకోవడం ప్రమాదాన్ని తెచ్చిపెడుతుందన్నారు.

ఇళ్లలో సరైన వెంటిలేషన్ ఉండేలా చూసుకోవాలని ప్రజలను కోరారు.
ఇళ్ళు లేదా గదుల లోపల కట్టెలు లేదా బొగ్గును ఉపయోగించి మంటలను వెలిగించవద్దని అల్ ఐన్ పోలీస్ డైరెక్టరేట్ డైరెక్టర్ బ్రిగేడియర్ సయీద్ హుమైద్ బిన్ దల్మౌజ్ అల్ ధహేరి హెచ్చరించారు. ముఖ్యంగా రాత్రిపూట కట్టెల హీటర్లను ఉపయోగించవద్దని, ఊపిరాడకుండా లేదా మంటలు వచ్చే ప్రమాదం ఉన్నందున వాటి పక్కన పడుకోవద్దని ఆయన సూచించారు.తగినంత వెంటిలేషన్ ఉండేలా చూసుకుంటూ, అటువంటి హీటర్లను గదుల వెలుపల వెలిగించాలని లేదా పొగ బయటకు వెళ్లడానికి ప్రత్యేక ఎగ్జాస్ట్ వ్యవస్థలతో అమర్చాలని బ్రిగేడియర్ అల్ ధహేరి సూచించారు.