యూఏఈ: ప్రాంతీయ ఉద్రిక్తతల నేపథ్యంలో గత రెండు రోజులుగా యూఏఈలోని మార్కెట్లలో టమోటాలు మరియు ఉల్లిపాయలు వంటి కొన్ని ప్రాథమిక ఆహార వస్తువుల ధరలు స్వల్పంగా పెరిగాయి. దీని పై స్పందించిన ఆర్థిక మరియు పర్యాటక మంత్రిత్వ శాఖ, ఈ పెరుగుదల కేవలం తాత్కాలికమేనని మరియు సరఫరా గొలుసుపై పడిన పరిమిత ప్రభావం వల్లనే ఇది జరిగిందని స్పష్టం చేసింది. వినియోగదారులకు ఇబ్బంది కలగకుండా ఉండేందుకు ఇప్పటికే భారీ పరిమాణంలో అదనపు సరుకులను మార్కెట్లకు తరలించినట్లు అధికారులు వెల్లడించారు. దేశవ్యాప్తంగా సరఫరా నిరంతరాయంగా పెరుగుతున్నందున, రాబోయే కొద్ది రోజుల్లోనే ధరలు మళ్ళీ సాధారణ స్థితికి చేరుకుంటాయని ప్రభుత్వం భరోసా ఇచ్చింది. వంట నూనె, బియ్యం, పంచదార మరియు పాల ఉత్పత్తులు వంటి తొమ్మిది రకాల కీలక వస్తువుల ధరలను మంత్రిత్వ శాఖ ముందస్తు అనుమతి లేకుండా పెంచడం చట్టవిరుద్ధమని వ్యాపారులకు హెచ్చరికలు జారీ చేయబడ్డాయి.
ధరల స్థిరత్వాన్ని పర్యవేక్షించేందుకు ప్రభుత్వం దేశవ్యాప్తంగా తనిఖీలను ముమ్మరం చేసింది. ఇప్పటివరకు నిర్వహించిన సుమారు 7,105 ఫీల్డ్ ఇన్‌స్పెక్షన్లలో, అకారణంగా ధరలు పెంచిన 567 నిబంధనల ఉల్లంఘనలను అధికారులు గుర్తించి తగిన చర్యలు తీసుకున్నారు. యూఏఈ వద్ద ఆరు నెలల కాలానికి సరిపడా వ్యూహాత్మక ఆహార నిల్వలు (Strategic Stockpile) సిద్ధంగా ఉన్నాయని, అలాగే అంతర్జాతీయ భాగస్వామ్య దేశాల నుండి దిగుమతులు సజావుగా సాగుతున్నాయని మంత్రిత్వ శాఖ పేర్కొంది. షిప్పింగ్ మరియు లాజిస్టిక్స్ వ్యవస్థలు సమర్థవంతంగా పనిచేస్తున్నాయని, కాబట్టి వినియోగదారులు ఎటువంటి ఆందోళన చెందాల్సిన అవసరం లేదని మరియు తమ అవసరాలకు తగినట్లుగా మాత్రమే వస్తువులను కొనుగోలు చేయాలని అధికారులు సూచించారు.

--బాజీ షేక్(యూఏఈ)