మస్కట్: ఒమన్ సుల్తానేట్‌లో క్యాన్సర్ రేట్లు గణనీయంగా పెరిగాయి. 2021లో ఒమన్ సుల్తానేట్‌లో 2,510 కేసులు నమోదుకాగా, అంతకు ముందు సంవత్సరం 2,198 కేసులు నమోదయినట్లు జాతీయ క్యాన్సర్ రిజిస్ట్రీ నివేదిక తెలిపింది.

ఒమన్‌ దేశస్థులలో నమోదైన కేసుల సంఖ్య 2,318కి చేరగా, ఇది మొత్తం కేసులలో 92 శాతంగా ఉంది. ఇందులో పురుషులు 994 కేసులు (42.9 శాతం), మహిళలు 1,324 కేసులు (57.1 శాతం) ఉన్నారు. ఒమన్‌ దేశస్థులు కాని వారిలో 163 కేసులు నమోదయ్యాయి (6 శాతం). 14 సంవత్సరాలు మరియు అంతకంటే తక్కువ వయస్సు ఉన్న పిల్లలలో 155 కేసులు నమోదయ్యాయి.

జాతీయ క్యాన్సర్ రిజిస్ట్రీ 2021 సంవత్సరానికి సంబంధించిన క్యాన్సర్ నివేదికను విడుదల చేసింది. వ్యాధి నిర్ధారణ సమయంలో మహిళల సగటు వయస్సు పురుషుల కంటే తక్కువగా ఉంది.  పురుషులకు 58 సంవత్సరాలతో పోలిస్తే మహిళలకు 47 సంవత్సరాలుగా ఉంది.  

ఒమన్ సుల్తానేట్‌లో మహిళలలో రొమ్ము క్యాన్సర్ కు సంబంధించి 393 కేసులు నమోదయ్యాయి. దీని తర్వాత థైరాయిడ్ క్యాన్సర్‌ 196 కేసులు, కొలొరెక్టల్ క్యాన్సర్‌ 93 కేసులు, హాడ్కిన్ లింఫోమాకు 66 కేసులు మరియు మెదడు క్యాన్సర్‌కు సంబంధించి 64 కేసులు నమోదయ్యాయి. పురుషులలో 121 కేసులతో కొలొరెక్టల్ క్యాన్సర్, ఆ తర్వాత 79 కేసులతో హాడ్కిన్స్ లింఫోమా, 77 కేసులతో ప్రోస్టేట్ క్యాన్సర్, 66 కేసులతో థైరాయిడ్ క్యాన్సర్ మరియు లుకేమియాకు సంబంధించి 65 కేసులు నమోదయ్యాయి.