దిల్లీలో కురుస్తున్న భారీ వర్షాల కారణంగా న్యూదిల్లీ నుంచి చెన్నై వెళ్లే విమానాలకు అంతరాయం ఏర్పడినట్లు విమానాశ్రయాధికారులు తెలిపారు. దిల్లీ నుంచి వెళ్లాల్సిన వివిధ సంస్థలకు చెందిన 8 విమానాలు వర్షం కారణంగా వాతావరణం అనుకూలించక ఆలస్యంగా బయల్దేరినట్లు వారు తెలిపారు. దిల్లీ చేరుకోవాల్సిన పలు విమానాలకు కూడా అంతరాయం ఏర్పడింది. ఎడతెరిపి లేకుండా కురుస్తున్న వర్షాలకు నిన్నంతా అక్కడి రోడ్లపై నీరు నిలిచి ట్రాఫిక్‌కి కూడా తీవ్ర అంతరాయం ఏర్పడింది. ఈరోజు కూడా భారీ వర్షసూచన ఉన్నట్లు వాతావరణశాఖ తెలిపింది.