మస్కట్: ప్రస్తుత ప్రాంతీయ పరిస్థితి కారణంగా సెంట్రల్ బోర్డ్ ఆఫ్ సెకండరీ ఎడ్యుకేషన్ (CBSE) పదో తరగతి బోర్డు పరీక్షలను రద్దు చేసింది. ఒమన్ మరియు ఇతర మధ్యప్రాచ్య దేశాలలోని పాఠశాలలకు XII తరగతి పరీక్షలను వాయిదా వేసింది. ఈ మేరకు మార్చి 5న సర్క్యులర్‌ జారీ చేసింది. మార్చి 7 నుండి మార్చి 11వరకు జరగాల్సిన అన్ని పదో తరగతి పరీక్షలను రద్దు చేస్తున్నట్లు బోర్డు తెలిపింది. గతంలో మార్చి 2, 5 మరియు 6 వ తేదీలలో వాయిదా వేసిన పరీక్షలను కూడా రద్దు చేసినట్లు బోర్డు తెలిపింది. మధ్యప్రాచ్యంలో పదవ తరగతి అభ్యర్థుల ఫలితాల ప్రకటన విధానాన్ని తరువాత తెలియజేస్తామని బోర్డు తెలిపింది.

అలాగే, XII తరగతికి సంబంధించి మార్చి 7న జరగాల్సిన పరీక్షను వాయిదా వేశారు. సవరించిన తేదీలను తరువాత ప్రకటిస్తామన్నారు. మార్చి 7న పరిస్థితిని సమీక్షించి, మార్చి 9 నుండి జరగనున్న పరీక్షలకు సంబంధించి తదుపరి ఆదేశాలు జారీ చేస్తామని CBSE తెలిపింది. ఈ సర్క్యులర్ బహ్రెయిన్, ఇరాన్, కువైట్, ఒమన్, ఖతార్, సౌదీ అరేబియా మరియు యూఏఈలోని CBSE అనుబంధ పాఠశాలలకు వర్తిస్తుందని తెలిపింది.