దుబాయ్: ఈ ఏడాది రమదాన్ మాసంలో నివాసితులందరూ ప్రశాంతంగా, సౌకర్యవంతంగా ఉండాలనే లక్ష్యంతో దుబాయ్ పోలీసులు ప్రత్యేక చర్యలు చేపట్టారు. ఇందులో భాగంగా, నివాస ప్రాంతాల్లో మితిమీరిన శబ్దానికి కారణమవుతున్న వాహనాలపై నిఘా పెంచారు. ట్రాఫిక్ నిబంధనలను ఉల్లంఘిస్తూ, అనుమతి లేకుండా ఇంజిన్ లేదా ఎగ్జాస్ట్ మార్పులు చేసిన సుమారు 251 వాహనాలను స్వాధీనం చేసుకుని, రోడ్ల పై క్రమశిక్షణను కాపాడుతున్నారు.
మేజర్ జనరల్ అల్ మజ్రూయీ తెలిపిన వివరాల ప్రకారం, నగర ప్రశాంతతను మరియు నాగరికతను కాపాడటం ప్రతి ఒక్కరి బాధ్యత. వాహనాల నుండి వచ్చే అనవసరమైన శబ్దం వల్ల వృద్ధులు, అనారోగ్యంతో ఉన్నవారు మరియు పిల్లలకు ఇబ్బంది కలగకుండా ఉండేందుకు ఈ చర్యలు అవసరమని పోలీసులు అభిప్రాయపడ్డారు.రూల్స్ పాటించే డ్రైవర్లను అభినందిస్తూనే, నిబంధనలను అతిక్రమిస్తే Dh50,000 వరకు జరిమానా ఉంటుందని వారు గుర్తు చేస్తున్నారు. రమదాన్ పవిత్రతను కాపాడుతూ, అందరూ సురక్షితంగా మరియు ప్రశాంతంగా ప్రయాణించాలని అధికారులు ఆకాంక్షిస్తున్నారు.

--బాజీ షేక్(యూఏఈ)