నేషనల్ ఇన్ఫర్మాటిక్స్ సెంటర్ (NIC) భారీ స్థాయిలో ఉద్యోగాల భర్తీకి నోటిఫికేషన్ విడుదల చేసింది. మొత్తం 243 సైంటిస్ట్-బి ఖాళీలను భర్తీ చేయనున్నట్లు సంస్థ ప్రకటించింది. ముఖ్యంగా కంప్యూటర్ సైన్స్ & ఐటీ, ఎలక్ట్రానిక్స్ & కమ్యూనికేషన్, మరియు డేటా సైన్స్ & ఆర్టిఫిషియల్ ఇంటెలిజెన్స్ వంటి అత్యాధునిక విభాగాల్లో ఈ నియామకాలు జరగనున్నాయి. సాంకేతిక రంగంలో స్థిరపడాలనుకునే నిరుద్యోగ యువతకు ఇది ఒక మంచి అవకాశంగా చెప్పవచ్చు.

ఈ పోస్టులకు దరఖాస్తు చేసుకునే అభ్యర్థులు గుర్తింపు పొందిన యూనివర్సిటీ నుంచి సంబంధిత విభాగంలో ఇంజినీరింగ్ లేదా టెక్నాలజీలో బ్యాచిలర్ డిగ్రీ పూర్తి చేసి ఉండాలి. ఏఎంఐఈ (AMIE), డీఓఈఏసీసీ (DOEACC) బి–లెవల్ లేదా పీజీ డిగ్రీ ఉన్నవారు కూడా అర్హులే. అయితే, అభ్యర్థులకు తప్పనిసరిగా చెల్లుబాటు అయ్యే 2024, 2025 లేదా 2026 గేట్ (GATE) స్కోర్ ఉండాలి. దరఖాస్తుదారుల గరిష్ట వయోపరిమితి 30 ఏళ్లుగా నిర్ణయించారు. రిజర్వేషన్ నిబంధనల ప్రకారం వయోపరిమితిలో సడలింపులు ఉంటాయి.

ఆసక్తి మరియు అర్హత కలిగిన అభ్యర్థులు ఆన్‌లైన్ విధానంలో మాత్రమే దరఖాస్తు చేసుకోవాల్సి ఉంటుంది. దరఖాస్తుల స్వీకరణ ప్రక్రియ మార్చి 27 నుంచి ప్రారంభమై, ఏప్రిల్ 24 వరకు కొనసాగుతుంది. నిర్ణీత గడువులోగా అధికారిక వెబ్‌సైట్ ద్వారా అభ్యర్థులు తమ వివరాలను నమోదు చేసుకోవాలని అధికారులు సూచించారు. ఎంపికైన అభ్యర్థులు దేశవ్యాప్తంగా ఉన్న ఎన్ఐసీ కేంద్రాల్లో విధులు నిర్వహించాల్సి ఉంటుంది.