పశ్చిమ బెంగాల్ ముఖ్యమంత్రి సువేందు అధికారి రాష్ట్ర ప్రజలకు వరుస తీపి కబుర్లు అందించారు.ఎన్నికల సమయంలో ఇచ్చిన హామీలను అమలు చేసే దిశగా అడుగులు వేస్తున్నట్లు ఆయన ప్రకటించారు. ముఖ్యంగా మహిళలకు ఉచిత బస్సు ప్రయాణం,కేంద్ర ప్రభుత్వ ఆరోగ్య బీమా పథకం ఆయుష్మాన్ భారత్ అమలుపై ఆయన కీలక స్పష్టతనిచ్చారు.

మహిళలకు ఆర్థిక భరోసా: ఉచిత బస్సు ప్రయాణం
జూన్ 1వ తేదీ నుంచి రాష్ట్రవ్యాప్తంగా మహిళలకు ఉచిత బస్సు ప్రయాణ సదుపాయాన్ని కల్పిస్తున్నట్లు సీఎం వెల్లడించారు.

లబ్ధిదారులు: ఈ పథకం ద్వారా ఉద్యోగినులు, విద్యార్థినులతో పాటు ప్రజారవాణాపై ఆధారపడే లక్షలాది మంది మహిళలకు ప్రయోజనం చేకూరనుంది.
ఉద్దేశం: పెరుగుతున్న జీవన వ్యయాల దృష్ట్యా మధ్యతరగతి, పేద కుటుంబాలపై ఆర్థిక భారాన్ని తగ్గించడమే ఈ నిర్ణయం ప్రధాన లక్ష్యమని ఆయన పేర్కొన్నారు.

గతంలో రాష్ట్రంలో నిలిచిపోయిన కేంద్ర ఆరోగ్య బీమా పథకం ఆయుష్మాన్ భారత్ ను వచ్చే నెల నుంచి పునరుద్ధరించనున్నట్లు ముఖ్యమంత్రి తెలిపారు. రాష్ట్ర ప్రజలకు మెరుగైన వైద్య సేవలు అందించేందుకు ఈ నిర్ణయం తీసుకున్నట్లు చెప్పారు. ప్రస్తుతం అమల్లో ఉన్న ఇతర సామాజిక సంక్షేమ పథకాలన్నీ యధావిధిగా కొనసాగుతాయని ప్రజలకు హామీ ఇచ్చారు.

విద్యుత్, విద్య, ఇతర శాఖల్లో ఉద్యోగాల భర్తీకి సంబంధించి కేబినెట్ మరో కీలక నిర్ణయం తీసుకుంది.”పాఠశాలల్లో ఉద్యోగాల భర్తీకి సంబంధించి అభ్యర్థుల వయో పరిమితిని ఐదేళ్లు పొడిగించే ప్రతిపాదనకు కేబినెట్ ఆమోదం తెలిపింది,” అని సీఎం సువేందు అధికారి వెల్లడించారు.ఈ నిర్ణయంతో రాష్ట్రంలోని వేలాది మంది నిరుద్యోగ అభ్యర్థులకు కొత్త అవకాశం లభించినట్లయింది. ప్రభుత్వ ఆదేశాలతో రాష్ట్ర యంత్రాంగం ఈ పథకాల అమలుకు సర్వం సిద్ధం చేస్తోంది.