యూఏఈ: యూఏఈకి తిరుగు ప్రయాణపు విమానం ఎక్కడానికి కొన్ని గంటల ముందు, కేరళలోని కొల్లాం జిల్లాలో నివసిస్తున్న ఒక వృద్ధ భారతీయ ప్రవాస దంపతులు శనివారం తమ నివాసంలో విగతజీవులుగా పడిఉన్నారు.

67 మరియు 60 ఏళ్ల వయస్సు గల ఆ దంపతులు, కడక్కల్‌లోని అంచుముక్కులో ఉన్న తమ ఇంట్లో ఉదయం 11.15 గంటల ప్రాంతంలో గుర్తించారు. ఇంటి తలుపును పదేపదే తట్టినప్పటికీ ఎవరూ సమాధానం ఇవ్వకపోవడంతో.. కుటుంబ సభ్యులు, బంధువులు కిటికీలోంచి చూడగా బెడ్ రూమ్ లో ఆ దంపతులు స్పృహ కోల్పోయి కనిపించారని పోలీసు అధికారులు చెప్పినట్లు భారత మీడియా సంస్థలు పేర్కొన్నాయి. మృతదేహాలను పోస్ట్‌మార్టం కోసం కొల్లంలోని ప్రభుత్వ వైద్య కళాశాల ఆసుపత్రికి తరలించారు.

ప్రాథమిక విచారణలో వారి మరణానికి ఆర్థిక ఇబ్బందులే కారణమని సూచిస్తున్నప్పటికీ, వారి మరణానికి గల కచ్చితమైన పరిస్థితులను దర్యాప్తు అధికారులు అధికారికంగా ధృవీకరించలేదు. తుది నిర్ధారణకు రావడానికి ముందు పోలీసులు పోస్ట్‌మార్టం నివేదిక కోసం ఎదురుచూస్తున్నారు.  

కాగా, ఆ దంపతులు అదే రోజు రాత్రి దుబాయ్‌కి తిరిగి వెళ్లడానికి బుక్ చేసుకున్న విమాన టిక్కెట్లను కూడా స్వాధీనం చేసుకున్నారు. ఈ దంపతులు చాలా సంవత్సరాలుగా ప్రధానంగా గల్ఫ్‌లో నివసిస్తున్నారని, కొద్ది రోజుల క్రితమే ఒక చిన్న పర్యటన కోసం కేరళకు తిరిగి వచ్చారని సమాచారం. వారు సుమారు నాలుగు నుంచి ఐదు రోజుల క్రితం కొల్లంకు చేరుకున్నారని పోలీసులు మీడియాకు తెలిపారు.

కడక్కల్ పోలీసులు భారతీయ న్యాయ సంహిత (బీఎన్ఎస్)లోని సంబంధిత నిబంధనల కింద అసహజ మరణంగా కేసు నమోదు చేసి, ఈ ఘటనపై సమగ్ర దర్యాప్తు ప్రారంభించినట్లు తెలిపారు. ఈ దంపతులకు ఒక కుమారుడు, ఒక కుమార్తె ఉన్నారు.  వీరిద్దరూ విదేశాలలో స్థిరపడ్డారని సమాచారం. పోస్టుమార్టం నివేదిక వచ్చాక, కొనసాగుతున్న దర్యాప్తు తర్వాత మరిన్ని వివరాలు వెల్లడవుతాయని పోలీసు అధికారులు తెలిపారు.