జెడ్డా: సౌదీ పోర్ట్స్ అథారిటీ (Mawani), ఎమిరేట్స్ షిప్పింగ్ లైన్ కొత్త “SRS” షిప్పింగ్ సర్వీసును జెడ్డా ఇస్లామిక్ పోర్ట్‌కు జోడించింది. ఇది ఆ పోర్టును ఇండియా మరియు జిబూటీలతో కలుపుతూ, ప్రపంచ మార్కెట్లతో సౌదీకి ఉన్న కనెక్టివిటీని మరింత పెంచుతుందని భావిస్తున్నారు. అలాగే సప్లై చైన్ సామర్థ్యం మెరుగుతపడుతుందని,  ప్రపంచంలోని అత్యంత ముఖ్యమైన సముద్ర మార్గాలలో ఒకటైన రెడ్ సీ మీదుగా వాణిజ్య రాకపోకలకు మద్దతు లభిస్తుందని అథారిటీ తెలిపింది.

ఇక జెడ్డాను ఇండియాలోని ముంద్రా పోర్ట్ మరియు జిబూటీ పోర్ట్‌తో అనుసంధానించే ఈ కొత్త షిప్పింగ్ సర్వీస్, 2,144 TEUల వరకు సరుకును మోసుకెళ్లే సామర్థ్యాన్ని కలిగి ఉంది. ప్రపంచ పనితీరు సూచికలలో సౌదీ అరేబియా ర్యాంకింగ్‌ను మెరుగుపరచడానికి మరియు జాతీయ ఎగుమతులకు మద్దతు ఇవ్వడానికి సౌదీ పోర్ట్స్ అథారిటీ చేస్తున్న ప్రయత్నాలలో ఇది ఒక భాగమని ప్రకటించారు. మూడు ఖండాలను కలిపే వారధిగా సౌదీని నిలబెట్టి, దానిని ఒక ప్రపంచ లాజిస్టిక్స్ కేంద్రంగా మార్చాలనే జాతీయ రవాణా మరియు లాజిస్టిక్స్ వ్యూహం లక్ష్యాలకు కూడా ఇది మద్దతుగా నిలుస్తుందని అథారిటీ తెలిపింది.