పాకిస్థాన్‌లో గురువారం ఉదయం మరోసారి బాంబు పేలుడు సంభవించింది. క్వెట్టా నగరంలోని అల్‌ఖైర్‌ ఆస్పత్రి వద్ద పేలుడు చోటుచేసుకుంది. పేలుడు ధాటికి 13 మంది గాయపడినట్లు సమాచారం. ఆస్పత్రి ఆవరణలోని ఓ వంతెన కింద బాంబు అమర్చి ఉంటారని బెలూచిస్థాన్‌ హోంమంత్రి మీర్‌ సర్ఫరాజ్‌ బుగ్తి పేర్కొన్నారు. బెలూచిస్థాన్‌ ఫెడరల్‌ న్యాయస్థానం జడ్జి జహూర్‌ శివానీ లక్ష్యంగా ఈ పేలుడుకు పాల్పడినట్లు భావిస్తున్నారు. పోలీసులు, సహాయక సిబ్బంది ఘటనాస్థలికి చేరుకుని సహాయక చర్యలు చేపట్టారు. సోమవారం ఇదే నగరంలోని సివిల్‌ ఆస్పత్రిలో జరిగిన పేలుళ్లలో 70 మంది ప్రాణాలు కోల్పోగా, దాదాపు 100 మంది గాయాలపాలైన సంగతి తెలిసిందే.