ఫుజైరా: వేసవి సెలవుల సందర్భంగా కుటుంబాలు బీచ్‌లు, స్విమ్మింగ్ పూల్స్, పర్వత ప్రాంతాలకు ఎక్కువగా వెళ్తున్న నేపథ్యంలో పిల్లలను నీటి వనరుల వద్ద క్షణం కూడా ఒంటరిగా వదిలేయొద్దని ఫుజైరా పోలీసులు విజ్ఞప్తి చేశారు. మసాఫీ సమగ్ర పోలీస్ స్టేషన్, మీడియా మరియు పబ్లిక్ రిలేషన్స్ విభాగం సంయుక్తంగా చేపట్టిన అవగాహన కార్యక్రమంలో భాగంగా, పిల్లలపై నిరంతర పర్యవేక్షణే మునిగిపోయే ప్రమాదాలను నివారించే అత్యంత ప్రభావవంతమైన మార్గమని పోలీసులు పేర్కొన్నారు.

భద్రతా నిబంధనలు పాటించడం, చిన్నారులపై నిరంతర నిఘా ఉంచడం ద్వారా మునిగిపోయే ప్రమాదాలను గణనీయంగా తగ్గించవచ్చని తెలిపారు. ముఖ్యంగా చిన్నపిల్లలు కేవలం కొన్ని క్షణాల్లోనే ప్రమాదంలో పడే అవకాశం ఉన్నందున అప్రమత్తత అత్యవసరమని హెచ్చరించారు.

ఫుజైరా పోలీసుల సీనియర్ అధికారి మాట్లాడుతూ..  పిల్లల భద్రత అనేది తల్లిదండ్రులు, సంరక్షకుల నుంచి ప్రారంభమయ్యే ఉమ్మడి బాధ్యత అని అన్నారు. వేసవి సెలవుల్లో బీచ్‌లు, స్విమ్మింగ్ పూల్స్ వంటి ప్రదేశాలకు కుటుంబాలు అధికంగా వెళ్లే కారణంగా పిల్లలను ఎప్పుడూ ఒంటరిగా వదిలివేయరాదని సూచించారు.

లైఫ్‌గార్డులు లేదా పెద్ద పిల్లలపై మాత్రమే ఆధారపడకుండా తల్లిదండ్రులే ప్రత్యక్షంగా పర్యవేక్షించాలని పోలీసులు సూచించారు. అవసరమైనప్పుడు పిల్లలకు తగిన ఫ్లోటేషన్ డివైసులు ఉపయోగించాలని, అనుమతించిన ప్రాంతాల్లో మాత్రమే ఈత కొట్టాలని, బీచ్‌లు, స్విమ్మింగ్ పూల్స్ వద్ద ఉన్న భద్రతా సూచనలను తప్పనిసరిగా పాటించాలని కోరారు.

కుటుంబ విహారయాత్రల సమయంలో క్షణిక నిర్లక్ష్యం కూడా ప్రాణాపాయ పరిస్థితికి దారితీయవచ్చని హెచ్చరించారు. ఈ అవగాహన కార్యక్రమం ద్వారా సమాజంలో భద్రతా సంస్కృతిని పెంపొందించడం, నివారణ చర్యలపై ప్రజల్లో చైతన్యం కల్పించడమే లక్ష్యమని ఫుజైరా పోలీసులు తెలిపారు.

పిల్లల భద్రతకు అత్యంత ప్రాధాన్యం ఇవ్వాలని, అప్రమత్తతతో వ్యవహరిస్తే నివారించగల విషాదాలను అడ్డుకోవచ్చని, ప్రతి కుటుంబం సురక్షితమైన, ఆనందకరమైన వేసవి సెలవులను గడపాలని పోలీసులు పిలుపునిచ్చారు.